Tegin úıirmeniń túıtkili

Áýelde jaqsy qarqynmen bas­talyp, balalardy sportqa, shyǵar­mashylyqqa baýlıtyn úıirmeler kóptep ashylǵany ras. Memlekettiń qarjylandyrýymen jergilikti ká­sipkerler balalarǵa arnalǵan or­talyqtar jumysyn qyzý bastap ket­kenin de bilemiz. Joba balalarǵa ǵana emes, jumys oryndarynyń da kóbeıýine septigin tıgizdi. Alaıda jol ortasyna kelgende aqsha bólin­beı birshama úıirme jabylyp tyndy. Sońy sıyrquıymshaqtanyp ketken bastamanyń bas-aıaǵyn mataǵan túıin sheshilmeı keledi. Jaýapty mınıstrlik pen jergilikti ákimdikter tarapynan «Qarastyramyz, biraq ýáde bere almaıyz. Kútińizder...» degennen ózge jaýap bolmaı tur.

«Balalar úıirmesi» qyzmetin qaıta qalpyna keltirgen jón. Onda jas­tarymyz qolónerdiń jáne shy­ǵarmashylyqtyń bastapqy negiz­deri­men tanysar edi. Balalar úshin qaterli búgingideı aýmaly-tókpeli zamanda olardyń kúsh-jigeri men qy­zyǵýshylyǵyn durys arnaǵa baǵyt­taý asa mańyzdy. Balalar mem­le­ketimizdiń bolashaǵy emes pe?! Ákim­derdiń jumysyn osy ólshem boıynsha da baǵalaımyz», degen Mem­leket basshysynyń tapsyrmasy sóz kúıinde qalǵanǵa uqsaıdy.

Resmı málimetke súıensek, res­pýblıka boıynsha joba negizinde 560 myńnan asa bala qamtylmaq. Al Astana qalasy boıynsha 86 188 bala úıirmelerge barýǵa tıis. «Ba­lalardyń áleýetin arttyrý maq­sa­tyn­da óńirlerde 86,7 mlrd teńge bó­linip, nátıjesinde 560 myńnan asa bala men jasóspirim tegin sport seksııalarymen jáne shy­ǵarmashylyq úıirmelermen qam­tamasyz etiledi. Endigi kezekte óńir­ler prosedýralyq máselelerdi jedeldetip, tez arada jumysqa kiri­sýi qajet. Osy oraıda oblystyq sport basqarmalarynyń basshylarymen birlesip jumys atqarý, Memleket basshysy tapsyrmasyn sa­paly oryndaý – ortaq mindet», degen edi eks-mınıstr Ashat Oralov.

О́zderińiz biletindeı, qazir ArtSport-pen qatar «DamuBala» platformasy da jumys isteıdi. Alaıda naýryz aıynan beri «DamuBala»-ǵa qarjy bólinbegendikten, úıir­me­ler­ge qatysatyn bala sany azaıyp, keıbiri jumysyn toqtatqan. Qan­shama bala áli kezegin kútip júr. ArtSport uıymdastyrýshylary balasyn tegin úıirmege berýge kezekte turǵan ata-analarǵa ýáde berýden  sharshaǵanyn aıtady.

– Bizge bólinedi degen 15 mlrd teńgeniń 5,7 mlrd teńgesi áli tıgen joq. Soǵan baılanysty jumysy­myz­ turalap qaldy. Ata-analar da ba­lalaryn úıirmelerge bere almaı otyr. Kásipkerlerdiń moınyn­da ǵımaratty jaldaý aqysy, qyzmet­ker­lerge tóleıtin jalaqysy bar. Elor­dada tegin úıirmege tirkelgen 69 myń balanyń ári qaraıǵy «taǵdyry» kúni búginge deıin beımálim bolyp tur. Sondyqtan shyǵarmashylyq jáne sport baǵytyndaǵy ArtSport úıir­melerine 2023 jyly bólingen qar­jyny qaıta qarap, jyl sońyna deıin jetetin qarajat kólemin naq­tylaýdy suraımyz. Sondaı-aq Úkimetten Astana qalasyna 86 188 ba­laǵa bekitken 86 188 vaýcherdi jyl boıyna toqtaýsyz tolyq kóle­min­de qarjylandyrý tetigin qaıta eseptep, kem degende bólinetin qara­jatty 15 mlrd teńgege deıin jet­kizýin surap otyrmyz, deıdi ArtSport qaýymdastyǵynyń tóraıy­my Lana Bolat.

Qaýymdastyq ókilderiniń shaǵy­myn tyńdaǵan Astana qalalyq más­lıhatynyń depýtaty Asqar Sma­ǵulov máseleni ákimdikpen aqyl­dasa otyryp sheshý keregin aıtty. «Birden qarjy bólinedi deý qıyn» ekenin de eskertti.

– Árıne, biz de balalardyń qa­tarynan qalmaı, tegin úıirmelerge qatysýǵa múmkindik alǵanyn qalaı­myz. Máseleniń mán-jaıyn túsinip otyrmyz. Biraq qarjy bólý ıa bólmeýdi ákimdik sheshedi. Muny kún tártibine qoıyp, jaýapty adam­dardan naqty jaýap alýǵa tyry­samyz. Alaıda aıta ketetin máse­le bar. Bul – platforma júıesi. Onda biraz olqylyq bar. Osyndaı or­talyqtardy tekserý kezinde úıir­me­ge qatyspaıtyn balalardyń da tizimde júretini anyqtaldy, dedi A.Smaǵulov.

Al Astana qalalyq Ekonomıka jáne bıýdjettik josparlaý bas­qar­ma­sy aqshanyń bári qystan shyǵýǵa, káriz júıelerin jóndeýge, jylý má­selelerin sheshýge jumsalǵanyn alǵa tartyp otyr.

Ata-analardyń aıtýynsha, mektepte 1 bala 1 ǵana úıirmege tegin qa­tysa alady. Eki-úsh úıirmege qa­tar barý úshin aqsha tóleý kerek. Bıyl úıirmelerdiń aqysy eki ese kóterildi. Sondyqtan keı­bir ata-analardyń qaltasy bala­nyń­ qalaýyn kótere almaıdy. Son­daı kezde ArtSport sekildi plat­for­malardyń qyzmeti jaqsy kómek­te­sedi. «Memlekettiń qoldaýy ba­la­lary­myzǵa úlken qýanysh syılar edi», deıdi ata-analar.

– Balalarym «DamuBala» plat­for­masyndaǵy úıirmelerge qa­ty­­syp júrgen edi. Olar óz qalaý­lary­­men birneshe úıirmege baratyn. «DamuBala» balalarymnyń bos ýa­qytyn tıimdi paıdalanýǵa ári qy­zyǵýshylyqtaryn damytýǵa sep­ti­gin tıgizdi. Biraq jumys toqtap qal­ǵanda qatty qynjyldym. Olar memlekettik tegin bir úıirmeden bólek basqalaryna da qatysqysy keledi. Biraq bular aqyly. Kópbala­ly ana bolǵandyqtan, tóleýge shamam kel­meıdi, deıdi 6 balanyń anasy.

Tap-tamasha bastama edi. Átteń sońy suıylyp barady...