Baıqap otyrsaq, ulttyq beıneleý óneriniń nebir maıtalmandary otbasy, áýlet, tek taqyrybynda tamasha týyndylar qaldyrǵan. Máselen, Ábilhan Qasteevtiń «Ana», Qanapııa Teljanovtyń «Jamal», Salıhıtdın Aıtbaevtyń «Baqyt», Gúlfaırýs Ismaılovanyń «Otbasymen avtoportret», Jumaqyn Qaırambaevtyń «Áke portreti» syndy týyndylary – qaıtalanbas en baılyq.
Búginde osy qylqalam sheberleriniń jolyn jalǵastyrǵan shákirtteri de az emes. Otbasy kúni qarsańynda Almatyda ónerde aǵa býynnyń izin basqan sýretshi Oralbek Qabókeniń «Shezhire» atty kórmesi ashyldy.
Mundaı kórmelerdi uıymdastyrýǵa «Art of Her» men «Almaty Gallery» medıa-portaly muryndyq bolyp júr. Al «Shezhire» sýret kórmesin – árbirimizdiń túp-tamyrymyz, ata-babalardyń júrip ótken jolyn beıneleıtin tarıhı jad desek te bolǵandaı.
Tarıhpen tabıǵı baılanystaǵy kórmege ulttyq beıneleý óneriniń klassıkalyq keskindeme mektebiniń dástúrin jalǵastyryp júrgen sýretshiniń 50-ge jýyq týyndysy qoıylǵan. Olardyń birazy – buǵan deıin Qazaqstan, О́zbekstan, Soltústik Kıpr, Ábý-Dabı (BAÁ), Seýl (Ońtústik Koreıa), Bolgarııa, Máskeý (Reseı) syndy halyqaralyq jáne respýblıkalyq kórmelerge qatysqan týyndylar.
«Art of Her» – jaı ǵana medıa emes, otandyq sýretshilerdi biriktirip, qoldaıtyn, damytýǵa kómektesetin alań. Biz byltyrdan beri «Almaty Gallery-men» birlesip, Qazaqstanda Otbasy kúnine oraı jas sýretshilerdiń kórmesin uıymdastyryp kelemiz. Oralbek Qabóke eńbekterinen qanyq tústerdi, sulbalardyń aıqyndyǵyn, keskinderdiń, kompozısııalyq qurylymnyń naqtylyǵy men qarapaıymdylyǵyn kórýge bolady», deıdi osy medıa-portaldyń bas redaktory Rýs Bıketov.
Rasynda, sýretshi umytylyp bara jatqan otbasy qundylyqtaryn jańǵyrtýshy retinde kórinedi. Onyń jeke kórmesindegi adamdar beınesi muńǵa, qalyń oıǵa, jan qınalysyna túskendeı. Nege?
«Keıipkerlerimniń júzi nege osyndaı kóńil kúıde? Jumystaryma meniń jeke ómirim men otbasylyq jaǵdaıym da áser etetin bolýy kerek. Dál qazir men bul týraly tis jarǵym kelmeıdi...», deıdi sýretshi.
ALMATY