Munaıly astananyń jastary men bıýdjettik sala qyzmetkerleri Otbasy kúnine oraı jańa páterleriniń kiltterin aldy. Basybaıly baspanaǵa jetkender – Otbasy bank salymshylary. Olar «Atyraý jastary» jáne «2-10-20» baǵdarlamalary boıynsha páterli bolyp otyr.
Turǵyn úı kiltterin tabystaý saltanaty Atyraý qalasyndaǵy Sultan Beıbarys atyndaǵy ortalyq alańda keń kólemde atalyp ótti. Aldymen jınalǵandarǵa bıyl 20 jyldyǵyn atap ótip jatqan Otbasy banktiń qurylý tarıhy men qazirgi qyzmetine qatysty suraqtar qoıylyp, oıyndar uıymdastyryldy. Jeńimpazdarǵa estelik syılyqtar men jańa jıhaz alýǵa sertıfıkattar berildi.
Sharanyń basty qonaǵy, belgili «Orda» tobynyń ánshisi Dastan Orazbekov qyrkúıek aıynyń ekinshi jeksenbisinde atalyp ótetin Otbasy kúni qarsańynda turǵyndarǵa kóterińki kóńil-kúı syılap, úıli bolǵan azamattardy sahnadan shyn júrekten quttyqtady.
«Otbasy bank» AQ Basqarma tóraıymynyń orynbasary Nurlan Aqshanov baspana baqyty buıyrǵan jandarǵa kópten kútken páter kiltterin tabystady.
«Mundaı kollaborasııa alǵash ret Atyraýda iske asyp otyr. Serik Jambyluly bastaǵan jergilikti ákimdiktiń qoldaý bildirgenine rızamyn. Aldaǵy ýaqytta densaýlyq saqtaý salasynyń qyzmetkerlerin de úımen qamtýǵa birlese jańa jobalardy qolǵa alatyn bolamyz. Ár otbasy úıli bolsyn!», dedi Nurlan Saǵyndyquly.
Otbasy bank pen Atyraý oblystyq ákimdiginiń qoldaýymen bastaý alǵan aımaqtyq «Atyraý jastary» baǵdarlamasy aıasynda alpysqa jýyq otbasy baspanaly boldy. Qýanysh ıeleri sahna tórine shyǵyp, armandaǵan páter kiltin qoldaryna alyp, kóz jastaryna erik berdi. Olardyń arasynda muǵalim, dáriger, tipti, salyq qyzmetkerleri de bar.
«Men bul kúndi taǵatsyzdana kúttim. Sebebi, baspanaly bolý – basty armanym edi. «Úıi joqtyń, kúıi joq» dep beker aıtylmaǵan ǵoı. Búgin armanym oryndalyp, baqyttan balbul jaınap júrmin. Osy jaqsylyqtyń bárine sebepshi bolyp jatqan «Otbasy bankine» alǵysym sheksiz. El úshin eńbek etip júrgen bank qyzmetkerlerine mol tabys, zor jetistikter tileımin», deıdi baspanaly bolǵandardyń biri Marjan Aqtájıeva.