Búgin Qasym-Jomart Toqaev otandyq bıznes ókilderimen kezdesý ótkizdi, dep habarlaıdy Egemen.kz.
«Taıaýda aktıvterdi qaıtarý jóninde zań qabyldandy. Bul zań aktıvterdi qaıtarý sharalaryn bir maqsatqa jumyldyrýǵa baǵyttalǵan, ıaǵnı, muny qoǵamdyq kelisim aktisi dese de bolady. Túptep kelgende, bul shara ekonomıkamyzdy saýyqtyryp, áleýmettik jikke bólinýshilik pen adamdardyń arasyndaǵy alshaqtyqtyń aldyn alýǵa tıis. Adal bızneske, sheteldik jáne otandyq ınvestorlarǵa budan qaýiptenýdiń esh reti joq. Men Joldaýymda joǵary deńgeıde óńdelgen ónim shyǵaratyn klaster qurý kerek ekenin aıttym. Ekonomıkamyzdyń kóshbasshylary ındýstrııalandyrýdyń qozǵaýshy kúshine aınalyp, sońynan ónerkásippen aınalysýshy kásipkerlerdiń jańa tolqynyn ilestire alady», dedi Prezıdent.
Sondaı-aq Memleket basshysy metallýrgııa, hımııa, mashına jasaý jáne basqa da salalarda, kem degende, 15 iri jobany iske asyrý mindetin júktegen edi. Prezıdenttiń aıtýynsha, bul memlekettiń de, bıznestiń de mindeti.
«Bıýdjettiń múmkindikteri shekteýli. Buǵan qosa, memleket taǵaıyndaǵan menedjerler de tıisti deńgeıde jumys istemeıdi. Sondyqtan elimizdiń áleýetti iri bıznes ókilderine úndeý tastaǵym keledi. Sizderde qarjy da, tájirıbe de jetkilikti, álemdik naryqtarǵa shyǵatyn baılanystar da bar. Sondyqtan osyndaı jobalardy júzege asyrý máselesin qarastyrýǵa shamalaryńyz jetedi. Eldiń damýyna qarjy quıýǵa daıyn ekenderińizdi kórsetińizder», dedi Qasym-Jomart Toqaev óz sózinde.