Afrıkanyń taǵy bir eli Lıvııa sý tasqynynan zardap shekti. Derna qalasynda kúshti daýyldan keıin sý qoımasy jarylyp, taıaý mańdaǵy eldi mekenderdi shaıyp ketti. Qyzyl Krest jáne jergilikti sheneýnikter joıqyn sý tasqynynan keıin keminde 10 myń adamnyń iz-túzsiz joǵalǵanyn habarlady.
Lıvııanyń shyǵysyn baqylaıtyn ákimshiliktiń ókili Mohammed Ábý-Lamýsha memlekettik aqparat agenttigine bergen suhbatynda qaza tapqandardyń sany 5 300-den asqanyn habarlady. Shyǵys úkimetiniń taǵy bir ókili Tarık ál-Harraz búkil aýdandardy sý shaıyp, kóptegen múrdeniń teńizge aǵyp ketkenine toqtaldy.
Qazirgi tańda zırattarda máıitter júzdep sanalady. Tiri qalǵandar olardy áreń-áreń tanyp jatyr. Ál-Harrazdyń aıtýynsha, qaza tapqandar sany on myńnan asyp ketýi yqtımal. Halyqaralyq Qyzyl Krest jáne Qyzyl Jarty Aı uıymdary da osyndaı boljam jasap otyr.
Dúnıejúzilik densaýlyq saqtaý uıymynyń Lıvııadaǵy ókildiginiń qyzmetkeri Ramı Elshaheıbı Dernadaǵy jaǵdaı janshoshyrlyq ekenin atap ótti. Azamattyq avıasııa mınıstri Hıchem Chkıýat qaıtys bolǵandardyń kóbi sý basqan jerde qalǵanyn málimdedi.
«Máıitter shashylyp jatyr. Teńizde, jaǵalaýlarda, ǵımarattardyń astynda ólgender júzdep sanalady. Qalanyń 25 paıyzy joǵalyp ketti desem, artyq aıtqanym emes. Kóptegen ǵımarat qırady», deıdi H.Chkıýat.
Lıvııa talaı jyldan beri azamattyq soǵystan kóz asha almaı keledi. Sol sebepti eldegi ınfraqurylymdar ábden tozǵan. Buqaralyq aqparat quraldarynda taraǵan aqparatqa súıensek, ınjenerler buǵan deıin bógetterdiń jarylý qaýpi bar ekenin, shuǵyl túrde jóndeý jumystaryn júrgizýdi eskertken. Lıvııada ornalasqan «Sadeq» saraptamalyq ortalyǵynyń negizin qalaýshy Anas ál-Gomatı máseleni jan-jaqty zertteý kerektigine ekpin beredi.
«Soltústik Afrıka klımattyń ózgerýinen zardap shegedi. Biraq bul joly sybaılas jemqorlyq pen biliksizdik apatqa dýshar etti. Dernada evakýasııa bolǵan joq. Qazir qala turǵyndarynyń tórtten biri sý astynda qaldy», deıdi ál-Gomatı.