Túrkistan qalasyna jasaǵan jumys sapary aıasynda Ishki ister mınıstri Erjan Sadenov jańa ashylǵan zamanaýı úlgidegi ýchaskelik polısııa pýnktine bardy. Polısııa pýnkti 38 myńnan astam turǵyny bar Otyrar shaǵyn aýdanynda ornalasqan, dep habarlaıdy Egemen.kz.
Ýchaskelik beket qajetti qural-jabdyqtarmen tolyq qamtamasyz etilgen. Munda ýchaskelik polısııa, kámeletke tolmaǵandar isteri jónindegi ınspektorlarmen qatar, kóshi-qon qyzmeti, ákimshilik praktıka, probasııa qyzmetkerleriniń jumys, demalys oryndary qarastyrylǵan. Erikti kómekshilerge arnalǵan kabınet, azamattardy qabyldaý bólmesi, ana men bala bólmesi de bar. Múmkindigi shekteýli tulǵalarǵa kedergisiz kirýge jaǵdaılar jasalǵan, onyń ishinde arnaıy jabdyqtalǵan sanıtarlyq toraptar da bar. Ǵımarat tolyǵymen beınebaqylaý júıesimen qamtylǵan. Ishki ister mınıstri Erjan Sadenov, Túrkistan oblysynyń ákimi Darhan Satybaldy, Túrkistan oblysy polısııa departamentiniń bastyǵy Murat Qabdenov jańa bekettiń jumysymen tanysyp, jergilikti turǵyndarmen júzdesti. «Memleket basshysy Qasym-Jomart Kemeluly Toqaevtyń «Ádiletti Qazaqstan» qurý týraly ıdeıasynyń negizgi maqsaty – eldiń turaqtylyǵy men qaýipsizdigin qamtamasyz etý. Qoǵamnyń múddesi men talap-tilegin eskere otyryp, osy maqsatta jumyla áreket etýimiz qajet. Bul jaýapty is tikeleı quqyq qorǵaý salasy qyzmetkerleriniń adal eńbegi arqyly júzege asady. Sondyqtan polısııanyń kedergisiz qyzmet etýine ákimdik tarapynan barlyq qoldaý kórsetilip jatyr», dedi oblys ákimi Darhan Satybaldy.
О́ńirde qoǵamdyq qaýipsizdikti qamtamasyz etý máselesine kúsh salynǵan. Atap aıtqanda, qoǵamdyq tártipti saqtaýǵa óz úlesin qosý úshin «Ulttyq Ulannyń» áskerı bólimin qurý qolǵa alyndy. Ulandyqtardy ornalastyrý úshin Túrkistan qalasynan arnaıy ǵımarat belgilenip, qurylys jumystary júrip jatyr. Sondaı-aq bıyl polısııa departamentiniń jańa ǵımaraty paıdalanýǵa berildi. Departament janynan jedel basqarý ortalyǵy ashyldy. Polısııa qyzmetkerlerine byltyr 252 jańa kólik tabystalsa, bıyl taǵy da 30 avtokólik alyndy.