«Salamatty Qazaqstan» medısınalyq poıyzy óńirlerdi aralap júr. Bul poıyz 26 sáýirde Almaty-2 stansasynan jolǵa shyqqan. Sodan beri Almaty, Jetisý, Abaı, Ulytaý, Qaraǵandy, Qostanaı, Aqmola, Mańǵystaý, Atyraý oblystaryndaǵy 70 beketke toqtaǵan.
Medısınalyq poıyzdyń bas dárigeri Aınur Igenbaevanyń aıtýynsha, «Salamatty Qazaqstan» poıyzy – shalǵaı eldi mekenderdegi turǵyndarǵa kómek kórsetetin arnaıy joba. Quramynda 8 vagony bar. 4 vagon medısınalyq qural-jabdyqtarmen qamtylǵan. Elimizdiń shalǵaı stansalarynda turatyn 92 049 adam júgingen. Onyń ishinde 45 710 adam medısınalyq tekserýden ótken. Kómek alýshylardyń 10 520-sy – balalar. Dárigerler bes aıda poıyzda 5 377 ret shaǵyn hırýrgııalyq operasııa jasaǵan. Al psıhologııalyq jáne quqyqtyq keńes alýshylardyń sany 5 572 adamdy qurap otyr.
Bul poıyz Atyraý oblysyna 2 qyrkúıekte keldi. Munda 8 eldi mekenge aıaldaıtyny kózdelgen. Aldymen Jylyoı aýdanyndaǵy Toltyr, keıin Qurmanǵazy aýdanynda ornalasqan Aqkól stansasyna toqtady. Al Isataı aýdanyndaǵy Isataı stansasy – úshinshi beket. Munda 5-7 qyrkúıekte turǵyndarǵa tegin medısınalyq kómek, psıhologııalyq, quqyqtyq jáne medıatıvtik keńes berildi. Aýyl turǵyndary terapevt, stomatolog, oftalmolog, lor, hırýrg, ýrolog, nevropatolog, gınekolog sekildi bilikti dárigerlerdiń keńesin alyp, tegin tekserýge júgingen.
«Basty maqsatymyz – turǵyndarǵa tegin qyzmet kórsetý. Medısınalyq poıyzda bıohımııalyq taldaý, flıýrografııa, ishki aǵzalar men tamyrlardyń ÝDZ, elektrli kardıogramma jáne dıagnostıkalyq zertteýlerdiń basqa da túrlerin júrgizýge múmkindik qarastyrylǵan. Bizdiń quramdaǵy tájirıbeli mamandar turǵyndardyń kez kelgen saýalyna kásibı turǵydan tolyq keńes berdi. Dárigerler tekserýinen ótken turǵyndarǵa qorytyndysy sol sátte qolyna beriledi», deıdi A.Igınbaeva.
Jyljymaly medısınanyń dárigerine júgingenderdiń qatarynda Álip Qaıtaqpaev ta bar. Isataı stansasynda turatyn ol dárigerlerge áıelimen birge kelgen.
«Biz shalǵaı aýylda turamyz. Qaladaǵy dárigerlerge barý úshin jolkiresine qarjy qajet. Biraq densaýlyqty oılap, alańdap júremiz. Mine, «Salamatty Qazaqstan» medısınalyq poıyzynyń shalǵaı aýylǵa kelip, áıelim ekeýmiz dárigerlerdiń keńesin aldyq. Bul – biz úshin úlken qoldaý», deıdi Á.Qaıtaqpaev.
Aqqystaý aýyly – «Salamatty Qazaqstan» medısınalyq poıyzy toqtaǵan besinshi beket. Isataı aýdanynyń ortalyǵy Aqqystaý aýyldyq okrýginiń ákimi Ǵadil Boranbaevtyń aıtýynsha, munda 10 648 adam turady. Aýdan turǵyndaryna bir aı buryn medısınalyq poıyzdyń keletini habarlanǵan.
Turǵyndar terapevt, stomatolog, oftalmolog, lor, hırýrg, ýrolog, nevropatolog, akýsher-gınekolog sekildi dárigerlerdiń keńesin alyp, tegin tekserýden ótti. Osynyń ózinen turǵyndardyń densaýlyǵyn kútýge jaýapkershiliginiń artqany baıqalady.
«Bizdiń dárigerler syrqaty bar jandardy esh kedergisiz qabyldaıdy. Aýyl turǵyndary stomatologtiń kómegine kóbirek júgindi. Nevropotolog pen hırýrgtiń qabyldaýyna, ÝDZ-ge túsýge kelgen turǵyndar kóp», dep málimdedi A.Igenbaeva.
Máselen, Kúlaıym Ábdirenova Aqqystaý aýylynda kópten turady. Onyń aýylynan Atyraý qalasyna barýy úshin jarty kún qajet.
«Qalaǵa jetken soń emhana baryp, kezekke turý kerek. Bir kúnde sharýa bite qoısa, jaqsy ǵoı. Keıde eki-úsh kúnge kidirýge týra keledi. Kópten aýyratyn tisim bar edi. Sony juldyryp shyqtym. Dárigerler meıirimdi, qoly jeńil eken. Oblys ortalyǵynan alystaǵy aýyl turǵyndary úshin osyndaı dárigerler jıirek kelgenin qalaımyz», dedi ol.
Atyraý oblysy