Búgin Almatydaǵy jańadan ashylǵan Olımpıadaǵa daıarlyq ortalyǵynda Jazǵy Azııa oıyndaryna qatysatyn delegasııany shyǵaryp salý rásimi ótti. Saltanatty jıynǵa Sport jáne týrızm mınıstri Ermek Marjyqpaev, Sportty damytý dıreksııasynyń basshysy Erbol Myrzabosynov, jeńil atletıkadan qazaq sportynyń ańyzy, KSRO eńbek sińirgen sport sheberi Ámın Tuıaqov qatysty. Is-shara aıaqtalǵannan keıin mınıstr E.Marjyqpaevqa suraq qoıǵan edik.
– Ermek Boranbaıuly, 2018 jyly Jakartada ótken Azııa oıyndarynda Qazaqstan quramasy beıresmı jalpykomandalyq esepte nebári 9-orynnan kórindi. Aldaǵy Azııa oıyndarynda qandaı maqsat qoıyp otyrsyzdar?
– Aldymen búgingi is-shara ótken Olımpıada daıarlaý ortalyǵy týraly aıta ketsem. 40 gektar jerge ornalasqan ortalyqta toǵyz sporttyq nysan bar. Sonyń altaýy paıdalanýǵa berilip otyr. Qalǵany Respýblıka kúnine oraı ashylady degen jospar bar. Atalǵan ortalyqta bir mezette 2300 sportshy jattyǵý ótkize alady. Endi sportshylarymyz úlken doda aldynda teńdesi joq ortalyqta alańsyz jattyǵa alady.
– Suraqqa naqty jaýap berseńiz?
– Suraǵyńyzǵa kelsek, árıne sportshylarymyz Azııa oıyndarynda Ánuranymyzdy kóbirek shyrqatsa deımiz. 2018 jyly 75 medal, sonyń ishinde 15 altyn jeńip, úzdik ondyqtyń qatarynda bolǵanbyz. Árıne, bul nátıjege kóńilimiz tolmaıdy. Endi nátıjeni jaqsartyp, Jakartadaǵy kórsetkishten tómen bolmaýymyz kerek. Biraq sporttaǵy nátıjeni aldyn-ala boljaý qıyn. Onyń ústine segiz sport túrinen Olımpıada lısenzııasy úlestiriledi. Sondyqtan barlyq sportshy mundaı múmkindikti jibergisi kelmeıdi. Bizdiń de sportshylar aıanyp qalmaıdy.
– Mınıstr retinde emes, qarapaıym jankúıer retinde qaı sportshynyń tileýin tileısiz?
– Naqty bir sportshyǵa jankúıer bolǵanym durys emes shyǵar. Biraq meniń boksshy ári álem chempıony Karına Ibragımovanyń bapkeri ekenin bilesizder. Erler quramasynan da, qyzdar quramasynan da bir-bir altynnan kútemiz.