Bıde til joq, sulýlyq, talǵam hám taǵdyr bar. «Astana Operanyń» jetekshi solısi, Qazaqstannyń eńbek sińirgen qaıratkeri, álemdik balet juldyzy Baqtııar Adamjan men teatrdyń daryndy solısi Anastasııa Zaklınskaıa Shveısarııada Rolan Petıdiń «Jasóspirim jáne ólim» baletiniń premerasynda óner kórsetedi. Birtýar fransýz horeografynyń áıgili spektakli 16 qazan kúni Jenevada Balet keshi aıasynda usynylady.
– «Jasóspirim jáne ólim» – meniń súıikti baletterimniń biri. Nege deseńizder, munda akterlik sheberlikti kórsetip, ishtegi emosııalardy shyǵarýǵa bolady. Negizi bul balet jas jigittiń óz-ózine qol jumsaý aldynda onyń oıynda bolǵan dúnıelerdi beıneleıdi. Sondaı kúızeliste bolǵan jigittiń halin bı arqyly jetkizý óte aýyr. Alaıda balet óneri maǵan sonysymen unaıdy jáne ol basqalarynan aıryqsha tehnıkasymen erekshelenedi. Balet I.S.Bahtyń mýzykasyna qoıylǵan. Biraq áýen fon retinde ǵana júrip turady, sebebi is-qımyl oǵan dálme-dál ilesteıdi. Sondyqtan daıyndyq kezinde biz spektaklge mýzykasyz daıyndala beremiz. Qazir áriptesim Anastasııa ekeýmiz zalda osy qoıylymmen tyńǵylyqty jumys isteýdemiz. Premeraǵa birneshe kún qalǵanda Rolan Petıdiń assıstenti Lýıdjı Bonınomen birge taǵy daıyndalyp, spektakldiń birinshi kúni ónerimizdi pash etý úshin shveısarııalyq kórermenderdiń aldyna shyǵamyz, – dedi Baqtııar Adamjan.
Rolan Petıdiń «Jasóspirim jáne ólim» bir aktili baleti alǵash ret 1946 jyly 25 maýsymda Parıjdegi «Elıseı alaby» teatrynda kórsetilgen. Sodan beri ol álemniń kóptegen elinde qoıyldy. Onyń biri osy – Shveısarııa sahnasy. Samerata Venia jáne Geneva Dance Events ujymdarynyń uıymdastyrýymen ótetin biregeı Gala-kesh Jenevadaǵy Batıment des forses motrıses teatrynyń sahnasynda kórermenin qýantady. Aıtýly balettiń premerasynda óner kórsetýge elimizdiń úzdik ártisterin arnaıy shaqyryp otyr.
Atap aıtsaq, basty róldegi Baqtııar Adamjan «Jasóspirim jáne ólim» baletinde birinshi jyl óner kórsetip jatqan joq. Al onyń sahnadaǵy juby, teatr solısi Anastasııa Zaklınskaıa osynaý horeografııa jaýharymen kórermen qaýymnyń aldyna alǵash ret shyǵady.
– Áriptesim Baqtııar ekeýmiz Rolan Petıdiń «Jasóspirim jáne ólim» dep atalatyn bir aktili baletin bıleımiz. Men jasóspirimge boıjetkenniń beınesinde keletin О́limniń rólin somdaıtyn bolamyn. Atalǵan partııany tanymal balerınalar oryndaıtyndyqtan jáne ózim bul rólmen sahnaǵa alǵash ret shyǵaıyn dep jatqandyqtan eki ese qobaljý bar. О́z zamanynyń birtýar horeografy Rolan Petıdiń osyndaı ańyzǵa aınalǵan qoıylymynda ózimdi synap kóretinime óte qýanyshtymyn. Bul – men úshin úlken jaýapkershilik, – degen talantty bıshi Anastasııa Zaklınskaıanyń sózin sahnalyq seriktesi teatr premeri Baqtııar Adamjan:
– Endi bul balet ózimizdiń «Astana Opera» teatrynda da qoıylsa degen armanym bar. Kórermenderdiń de osy spektaklmen tanysqanyn, onyń teatr repertýarynda bolǵanyn qalaımyn. Sondyqtan álemdegi túrli spektaklderde óner kórsete otyra, sheteldegi balet keshterine trýppadaǵy áriptesterimdi de birge alyp barýǵa tyrysamyn. Sebebi ujymda osy baletti bıleıtin ártister barynsha kóp bolsa, spektakldiń bizdiń sahnada kórsetiletinine senim mol bolady, – dep sabaqtady.
Aıtýly óner oqıǵasy elorda teatrynyń negizgi jańalyǵy emes. Sonymen qatar jańa maýsymda «Astana Opera» balet trýppasynyń ártisterin German Levenskoldtyń «Sılfıda» baletinde tamasha tájirıbe kútedi. Shartarapty bekzat óner sharapatyna shomyldyratyn mazmundy gastroldik saparlar da teatrdyń kásibı tynysyn ashatyn jarqyn jobalar sanatynda. Budan bólek, ártisterdiń jeke gastrolderi de óz jalǵasyn tabady dep josparlanyp otyr. Atap aıtsaq, jaqyn kúnderi Baqtııar Adamjan Ońtústik Koreıa astanasy Seýlde Star Gala-da, AQSh-tyń San-Fransısko qalasynda Petipa Awards marapatyn tabystaý rásiminde, sonymen qatar Kıpr jáne basqa da elderde ónerin pash etedi.