Elimizde qazir jalpy 7 723 mektep jumys istep tur. Oqý-aǵartý mınıstrliginiń aqparatyna súıensek, osynshama oqý oshaǵynyń 2 449-y – qalalarda, 5 274-i aýyldarda ornalasqan. Bilim berý júıesi damyǵan elderde oqýshylar tek bir aýysymda oqıdy. Qazaqstanda áli kúnge apatty jáne úsh aýysymdy mektepter máselesi sheshilgen joq. Bul úshin qansha mektep salynbaq?
Buǵan deıin jazǵanymyzdaı, 1 qyrkúıekte 55 myń oryndyq 39 mektep paıdalanýǵa berilgen bolatyn. Bul óz kezeginde 12 apattyq jáne 29 úsh aýysymdy mekteptiń máselesin sheshti. Al mektep máselesinde kún tártibindegi mindet pen meje qandaı? Mınıstrliktiń málimdeýinshe, 2023-2024 oqý jylynda, ıaǵnı osy qyrkúıek aıynan bastap 132 myń oqýshyǵa arnalǵan 154 mekteptiń qurylysy bastaldy. Qazir óńirlerdegi 194 mektep jóndelip bitti, taǵy 66 mektep kúrdeli jóndeýden ótip jatyr. 2024 jyly taǵy 300-ge jýyq jańa mekteptiń qurylysyn bastaý josparlanǵan. Jańa jylda qurylysy bastalatyn jańa mektepter qaıda, qaı óńirlerde, nesheýden salynady? Osyǵan keńinen toqtalaıyq.
Jańa jylda bas-aıaǵy 296 mektep salynbaq, onyń eń kóbi Túrkistan oblysynda boı kóteredi. Týý kórsetkishi joǵary óńirde 43 mekteptiń qurylysy bastalady. 2024 jyly salynatyn mektepter sany boıynsha ekinshi orynda 31 mekteppen Aqtóbe oblysy tur. Alǵashqy úshtikti Almaty oblysy qorytyndylap tur, bul oblysta 28 oqý oshaǵy boı kótermek. Jańa mektep salý jóninde sanaqtyń sońyn Abaı oblysy (5 mektep), Soltústik Qazaqstan, Pavlodar, Jetisý oblystary (árqaısysy 3 mektepten), Ulytaý oblysy (2 mektep) túıindeıdi. Al betegeden bıik, jýsannan alasa bolyp ortada júrgen óńirlerdiń ishinde úsh megapolıs pen qalǵan 8 oblys bar. Ashyp aıtsaq, Almaty qalasynda – 26, Astanada – 25, Shymkentte 12 mektep salynady. Mańǵystaý oblysynda – 19, Atyraý oblysynda – 17, Jambyl oblysynda – 15, Aqmola oblysynda – 14, Qaraǵandy oblysynda – 13, Qyzylorda oblysynda – 12, Batys Qazaqstan oblysynda – 10, Shyǵys Qazaqstan oblysynda – 8, Qostanaı oblysynda 7 oqý oshaǵynyń irgesi qalanady.