Astanadaǵy Ulttyq akademııalyq kitaphanada jazýshy, kúıshi Talasbek Ásemqulovtyń shyǵarmalarynyń 6-8 tomdarynyń tusaýkeser rásimi ótip, respýblıkalyq Talasbek syılyǵynyń jeńimpazdary jarııalandy. Atalǵan tomdyqtar – qalamgerdiń kóptomdyq shyǵarmalarynyń jalǵasy.
Atalǵan is-sharaǵa fılologııa ǵylymdarynyń doktory, professor Aıgúl Ismaqova, Talasbektiń jary, belgili mıfolog Zıra Naýryzbaeva, aqyn Erbol Alshynbaı, taǵy basqa zamandas dostary men shákirtteri qatysyp, pikirlerin ortaǵa saldy.
Avtordyń Táttimbetke qatysty «Taltús» romany Soros-Qazaqstan qorynyń «Qazirgi zamanǵy Qazaqstan romany» ádebı báıgesiniń laýreaty atanǵanyn ádebıetsúıer qaýym bilse kerek. Jazýshynyń kózi tirisinde jaryq kórgen atalǵan kitabyn 2019 jyly «Shelley Fairweather Vega» (Shellı Feırýezer Vega) aǵylshyn tiline aýdaryp, ol «A Life at Noon Muraǵattalǵan 29 tamyzdyń 2019 jyly» degen atpen Indıana Ýnıversıtetiniń «Slavica Pub» baspasynan shyqty. Sonymen qatar roman «Rýhanı jańǵyrý» memlekettik baǵdarlamasy aıasynda BUU-nyń resmı tilderine aýdarylǵan.
«2013 jyly Talasbektiń kózi tirisinde III tomdyq jınaǵyn qurastyryp, jas kezinde Talasbekti qoldap, shyǵarmashylyqtaryn taldap pikir jazǵan, keıinnen bir-bir baspanyń tutqasyn ustaǵan inishekterine kirip shyqtym. «Aǵalaryń 2015 jyly 60 jasqa tolady, áli kúnge deıin bir ǵana kitaby shyqty, mereıtoıyna syılyq jasamaımyz ba?», dep edim. Eshqaısysy qozǵalmady.
2014 jyly Talasbek Ásemqulov dúnıeden ozdy. Adal shákirtteri men basqa da jastar jumylyp, 2015 jyly 10 tomdyq daıyndadyq. «Qazaq ensıklopedııasy» baspasynyń sol kezdegi bas redaktory Nurymjan Maýytov qoldap, 2016 jyly 5 tom shyqty, mine, taǵy 3 tom qosyldy.
Sonymen 10 jyl buryn bastalǵan joba iske asty. Eki tom tańdamaly aýdarmalaryn keıinge qaldyrdyq, óıtkeni avtorlyq quqyq máselesi qıyndaý eken. Jarty jyl serb jazýshysy, Nobel syılyǵynyń laýreaty Ivo Andrıch qorymen hat jazystym, biraq ruqsat ala almadym. Dálirek aıtqanda, olar ruqsat beredi, biraq ol aýdarǵan jazýshynyń aty muqabada turý kerek. Kóptomdyqtyń muqabasynda Talasbektiń aty ǵana jazylyp keledi ǵoı. Ekinshi tomda japon Kobo Abe jáne sol qatarly jazýshylar. Quqyq máselesi tym uzaqqa sozylatyn boldy. Sondyqtan ázirge osy 8 tommen toqtadyq. Osymen degenim, Talasbektiń jas kezinde talaı qoljazbasy joǵaldy. Olar tabyla ma eken?..», deıdi jazýshy muralaryna bas-kóz bolyp, jınaqtap bastyryp júrgen jary Zıra Naýryzbaeva.
Respýblıkalyq deńgeıde dástúrge aınalyp kele jatqan Talasbek syılyǵynyń «Úzdik ádebı shyǵarma» atalymyn Álıhan Jaqsylyq esimdi jas talaptyń «Kresten túsirý» áńgimesi ıelendi. «Talasbektaný» boıynsha úzdik maqala atalymyn Altynbek Mersadyq «Úlken ýaqyttyń mátini» eńbegi jeńip aldy.