Qazaqstannyń Reseıdegi elshiligi kórnekti memleket jáne qoǵam qaıratkeri Álıhan Bókeıhannyń qaza bolǵan kúnin eske alyp, stalındik qýǵyn-súrgin qurbandary jerlengen Don zıratyndaǵy baýyrlastar qabirine taǵzym etti.
«Alash» partııasy kóshbasshysynyń súıek kúli kómilgen jer ótken ǵasyrdyń 90-jyldarynyń basynda «Atý tizimderi: Don zıraty. 1934-1940» kitaby jarııalanǵannan keıin ǵana belgili bolǵan edi. Soǵan sáıkes Á.Bókeıhandy 1937 jylǵy 27 qyrkúıekte naqaq óltirgeni, onymen birge «atý tizimine» ilingenderdiń ishinde memleket qaıratkeri Nyǵmet Nurmaqov ta bolǵany anyqtaldy. Á.Bókeıhan 1989 jyly mamyrda KSRO Joǵarǵy sotynyń qaýlysymen qylmys quramynyń bolmaýyna baılanysty aqtaldy.