Jeńildetilgen nesıe: Uqsata bilgen utylmaıdy

Endi elimizdegi jas kásipkerlerge 5 mln teńgege deıin jeńildetilgen nesıe beriledi. Jastarǵa arnalǵan jańa joba «Agrarlyq nesıe» korpo­ra­sııasy arqyly beriletin nesıeni 21 jas­tan 35 jasqa deıingi azamattar alýǵa quqyly. Bul joba týraly Mem­leket basshysy bıylǵy Jol­daýyn­da da aıryqsha aıtqan bolatyn.

Eńbek jáne halyqty áleýmettik qorǵaý mınıstriniń málimetinshe, 6 myń jas azamatqa 5 jylǵa 2,5% jeńil­dikpen 5 mln teńgege deıingi jeńil­detilgen nesıe berilse, al erekshe qajettilikteri bar jastarǵa jáne halyqtyń áleýmettik osal top­tarynan shyqqan azamattarǵa 1,2 mln teńge mólsherinde 9 myń grant bólindi. Atalǵan jeńildetilgen ne­sıeni alýshylardyń basym bóligi – aýyl sharýashylyǵy, qyzmet kór­se­tý, saýda, jeńil ónerkásip sala­la­rynyń kásipkerleri.

Bıyl naýryz aıynyń sońynan bastap elimizdegi jas kásipkerler je­ńildetilgen nesıeni resimdep kási­bin dóńgelete bastaǵan. Sonyń biri – astanalyq jas kásipker Álibek Qanybek. Ol memleket tarapynan beriletin shaǵyn nesıe arqyly kásip ashyp, qazir 12 adamdy jumyspen qamtyp otyr. Jumys berýshi retinde ár jumysshyǵa 250-300 myń teńge kóleminde jalaqy tóleıdi. Álibek mem­lekettiń jas kásipkerlerge kási­bin keńeıtý úshin jeńildetilgen nesıe beri­letinin áleýmettik jeliler arqy­ly bilgenin aıtady.

– Jyl basynan bastap jıhaz sehyn ashýdy josparlap júrgende jeńildetilgen 2,5 paıyzdyq nesıe beriletinin estip, «Agrarlyq nesıe» korporasııasynyń keńesine júgindik. Sóıtip, Astana qalalyq ákimdigi Jumyspen qamtý jáne áleý­met­tik qorǵaý basqarmasyna qa­jetti qujattardy ótkizip, kóp uza­maı sáýir aıynda 5 mln teńge kóle­min­de je­ńildetilgen nesıege qol jetkizdik. Sonyń nátıjesinde jıhaz shyǵarýǵa qajetti stanoktar satyp alyp, kási­bimizdi bastap kettik. Biz úshin bul úlken qoldaý boldy, – deıdi jas kásipker.

Jas kásipkerlerge nesıe berý baǵdarlamasyn Eńbek jáne halyqty áleý­mettik qorǵaý mınıstrligi Kásip­ker­likti damytý jónindegi 2021-2025 jyldarǵa arnalǵan ulttyq joba sheńberinde júrgizedi. Ulttyq joba tek kásipkerlikti qoldap qana qoımaı, jumys oryndarynyń da ashylýyna septigin tıgizip otyrǵan kórinedi.

«Sýbsıdııalanatyn jumys oryndaryna 163,8 myń adam ornalastyryldy. Onyń ishinde áleýmettik jumys oryndarymen – 16,1 myń adam, jastar praktıkasymen – 19,3 myń adam, qoǵamdyq jumystarmen – 108,5 myń adam, «Alǵashqy jumys orny» jobasy boıynsha – 6,7 myń adam, «Urpaqtar kelisimsharty» jobasy boıynsha – 326 adam, «Kú­mis jas» jobasy aıasynda 12,9 myń adam jumyspen qamtyldy. Sondaı-aq «Bastaý Bıznes» jobasy boıynsha kásipkerlik negizderine oqytýmen 110,8 myń adam jumyspen qam­­tyl­dy, onyń ishinde 82,7 myń adam oqýdy aıaqtap, sertıfıkat­tar aldy. Qyzmet salasyn tańdaý maqsatynda 87,9 myń adam áleýmettik kásiptik baǵ­dar­laýdan ótti. Buǵan qosa 2023 jyly Ulttyq joba sheńberinde 400 AEK (1 380 000 teńge) mólsherinde jańa bıznes-bastamalardy iske asyrý úshin 9 myń grant berý kózdelgen. Ázirge jyl basynan beri 5 317 grant berildi», deıdi Eńbek jáne halyqty áleýmettik qorǵaý mınıstrliginiń baspasóz qyzmeti.

Bıyl qyrkúıek aıyndaǵy jaǵdaı boıynsha 2021-2025 jyldarǵa arnal­ǵan Kásipkerlikti damytý jónin­degi ulttyq jobasyna 503,4 myń adam qatysqan. 345,7 myń adam jumys­qa ornalasyp, onyń 181,9 myńy turaq­ty jumys ornyn taýypty.

Astana qalasy ákimdigi Jumys­pen qamtý jáne áleýmettik qorǵaý basqarmasy basshysynyń orynbasary Erlan Júsipovtiń aıtýynsha, aldaǵy ýaqytta qala ákimdigi men mem­leket tarapynan jas kásipkerler úshin qoldaý jalǵasa bermek.

– Prezıdenttiń tikeleı tapsyrmasymen 2,5 paıyzdyq jeńildikpen berilip jatqan bul nesıeler bes jyl merzimge beriledi. Shaǵyn sehtyń ıesi jas kásipker Álibek Qanybek te – sol baǵdarlamanyń ıgiligin kórip otyrǵan kásipkerdiń biri. Osy kúnge deıin 200-den asa astanalyq jas kásipker osyndaı kómekti alyp úlgerdi. Jyl aıaǵyna deıin bar­ly­ǵy 500 jas kásipkerdi qamtý josparlanǵan, – deıdi E.Júsipov.

Onyń sózinshe, mundaı jeńil­detilgen nesıeni shekti jas mól­sheri sáıkes keletin kez kelgen jas kásipker paıdalana alady. Tek ne­gizgi eki sharty bar. Onyń birin­shi­si – kásip ashqanyna bes jyldan as­paǵan bolýǵa tıis, ekinshisi – ne­sıeni resimdeý úshin jyljymaıtyn múlikti kepilge qoıýy qajet. So­ny­men qatar kásipker úshin atal­ǵan nesıeni tómen paıyzben 5 jylǵa berip qana qoımaı, alǵashqy 20 aıǵa deıin tólem merzimine úzilis jasaýǵa da bolady. Bul kásipker úshin jumysyn jandandyryp alǵan­sha qarastyrylǵan úlken kómek bolyp otyr.

– Biz ázirge juqa taqtaı kesetin eki stanok qana aldyq. Soǵan saı qazir tek aǵashtan jasalatyn túrli shkaf, asúı garnıtýry sııaqty jı­haz­­dar jasap jatyrmyz. Aldaǵy ýa­qytta sehty keńeıtip, jumsaq jı­haz­dar da shyǵarýdy josparlap otyr­myz, – deıdi Á.Qanybek.

«Eger de mal kerek bolsa, qol­óner úırenbek kerek... Aldaý qospaı adal eńbegin satqan qolónerli – qazaqtyń áýlıesi sol» degen hakim Abaıdyń ósıetin berik ustanǵan jas kásipker Álibek jıhaz óndirý salasyn damyta beretinin aıtady.