Aýǵanstannyń batys aýmaǵynda bolǵan zilzala (epısentri – Gerat provınsııasynda) saldarynan 2 500-ge jýyq adam qaza bolyp, 9 myń turǵyn jaralandy. 2 myń úı qırap, halyq baspanasyz qalyp otyr. Tabıǵı apattan keıin elimizdiń Úkimeti aýǵan halqyna shuǵyl gýmanıtarlyq kómek kórsetý týraly sheshim qabyldady.
Prezıdent Qasym-Jomart Toqaevtyń tapsyrmasyna baılanysty «KazAID» otandyq halyqaralyq damý agenttiginiń belsendi qatysýymen keshe Aýǵanstannyń Gerat provınsııasyna arnaıy avıabortpen salmaǵy 1600 tonnadan asatyn azyq-túlik, shatyrlar, kıim-keshek jáne tósek-oryn jabdyqtaryn qamtıtyn iri gýmanıtarlyq júk jetkizildi. Elimizden jetken kómekti Aýǵanstandaǵy Tabıǵı apattardyń saldarymen kúres jónindegi shtabtyń ókilderi, atap aıtqanda, Azamattyq áýejaılardyń bas dırektory Garval Abdýl Sattar qabyldady.
Sonymen qatar 10 qazanda Gerat provınsııasyna 45 adamnan turatyn Tótenshe jaǵdaılar mınıstrliginiń jedel-qutqarý toby kelip, qazirgi tańda Naıbrofı eldi mekeninde (Gerat qalasynan 50 shaqyrym jerde) qutqarý jumystaryn júrgizip jatyr. TJM taratqan málimetke qaraǵanda bul – zilzaladan eń qatty zardap shekken jer. Munda habar-osharsyz ketkenderdiń sany kóp. Jaqyn arada aýǵan halqyna temirjol kóligimen «Haıraton» stansasyna (Aýǵanstannyń Balh provınsııasy) kezekti iri gýmanıtarlyq júk jiberilmek.
Budan bólek, Ulttyq ulannyń bortymen de Aýǵanstanǵa gýmanıtarlyq kómek sátti jetkizildi. 8 ofıser men serjanttan turatyn ekıpaj 1300 shaqyrym qashyqtyqty artqa tastap, Gerat provınsııasyna medısınalyq buıymdar men dári-dármek apparattary, sondaı-aq shatyrlar túrindegi gýmanıtarlyq júkti alyp bardy.
– Jer silkinisi kezinde zardap shekken turǵyndarǵa gýmanıtarlyq kómek jetkizý jónindegi bitimgershilik mıssııasy oryndaldy. Bul bizdiń mundaı júkterdi tasymaldaýdaǵy alǵashqy tájirıbemiz emes. Buǵan deıin Ulttyq ulan avıasııasy gýmanıtarlyq júkterdi alys shetelderge, sonyń ishinde eki ret Sırııaǵa, tórt ret Túrkııaǵa jetkizgen edik. Esterińizde bolsa, bıyl aqpan aıynda osy elderde joıqyn jer silkinisi boldy. Biz bul joly da alǵa qoıǵan mindetti sátti oryndadyq, – dedi áýe kemesiniń komandıri Qurmanǵalı Topanov.
Gerat provınsııasynyń gýbernatory sheıh Nur Ahmad Islam Djar aýǵan halqy atynan elimizge turaqty gýmanıtarlyq kómek kórsetkeni, qıyn ýaqytta qoldaý kórsetkeni úshin alǵysyn bildirdi.