Italııanyń Pýla qalasynda máresine jetken shahmattan 20 jasqa deıingi jastar arasyndaǵy álem chempıonatynda otandasymyz Ksenııa Balabaeva altyn tuǵyrǵa kóterildi.
Álemniń 26 memleketinen 135 shahmatshy baq synaǵan jahandyq básekeniń blıs saıysynda Ksenııa Balabaevanyń baǵy janyp, álem chempıony atandy. Ol bas júlde úshin ótken básekede taǵy bir otandasymyz Əmına Qaıyrbekovamen oınap, teń tústi. Qosymsha kórsetkish boıynsha altyn medal K.Balabaevaǵa, kúmis júlde Á.Qaıyrbekovaǵa buıyrdy. Osylaısha, jyldam shahmat baǵdarlamasynyń jeńis tuǵyryna eki birdeı qazaq qyzy kóterildi. Al erler arasynda Arystan Isanjýlov 3-orynnan kórindi.
Sonymen qatar rapıd boıynsha da otandastarymyz úzdikter qatarynan tabyldy. Jerlesterimizdiń tek altyn júldege qol jetkize almaǵany bolmasa, keıingi tórt oryndy eshkimge bergen joq. Fınalda Ázerbaıjan ókili Govhar Beıdýllaevaǵa ese jibergen Ksenııa Balabaeva bul joly álemniń vıse-chempıony atansa, Zeınep Sultanbek qola júldege qol jetkizdi. Al tórtinshi jáne besinshi oryndardy Nazerke Nurǵalı men Lııa Qurmanǵalıeva ıelendi.