Qytaıdyń Hanchjoý qalasynda ótip jatqan jazǵy Azııa Para oıyndarynda balýandarymyz 5 medal oljalady, dep habarlaıdy Egemen.kz Týrızm jáne sport mınıstrliginiń baspasóz qyzmetine silteme jasap.
90 kelige deıingi salmaqta kúresken Janbota Amanjol (J2) para dzıýdodan kúmis medal aldy. Fınaldyq beldesýde Ońtústik Koreıa balýany Lı Djýngten jeńildi. 90 keliden joǵary salmaq dárejesinde Erlan О́tepov te fınalda súrinip, mońǵol sportshysy Ganbat Dashtseranǵa ese jiberdi.
J2 sanaty boıynsha 90 keli salmaqta kúresken Ǵalymjan Smaǵululy qola júlde úshin ótken tartysty beldesýde ózbek balýanynan basym tústi.
90 keliden joǵary salmaqta Erlan Qońqıev qytaılyq qarsylasyn 10:0 esebimen aıqyn utyp, jazǵy Azııa Para oıyndarynyń qola júldesin enshilese, osy salmaqta kúresken taǵy bir otandasymyz Talǵat Ájǵalıevke de qola medal buıyrdy.