5 qarasha kúni Batys Qazaqstan oblysynyń úsh aýdanynda pılottyq rejimdegi aýdan ákimderiniń saılaýy ótti. Jańa ákim saılanǵan Bókeı ordasy, Qaratóbe jáne Tasqala aýdandarynda barlyǵy 28 884 saılaýshy tirkelgen.
- Bul Memleket basshysy Qasym-Jomart Toqaevtyń bastamasymen qolǵa alynǵan ákimderdiń saılaý úderisi. Aýa raıy keremet boldy. Saılaý ótken úsh aýdanda barlyǵy 63 saılaý ýchastogy bar. Sol ýchastoktiń bárinde halyq tańdaýy ýaqtyly bastalyp, oıdaǵydaı ótti. Árıne, barlyq saılaý ýchaskeleri aldyn ala qajetti daıyndyqtan ótti. Sondyqtan saılaýshylardyń daýys berýine barlyq múmkindik jasaldy dep tolyq senimmen aıta alamyz. Osy joly dodaǵa ár aýdannan úsh adam qatysty. Sonyń ishinde Amanat partııasy men Qazaqstan halyq partııasynan usynylǵan kandıdattar bar. Qalǵany ózin ózi usynǵan úmitkerler. Olar osy kúnge deıin saılaýshylarmen kezdesip, úgit-nasıhatyn júrgizip, baǵdarlamalaryn tanystyryp, kóp jumys atqardy, - dedi Batys Qazaqstan oblystyq aýmaqtyq saılaý komıssııasynyń tóraǵasy Ǵaısa Qapaqov.
Aıta keteıik, saıası naýqanǵa quramynda 378 múshesi bar 1 oblystyq aýmaqtyq, 3 aýdandyq aýmaqtyq, 63 ýchaskelik saılaý komıssııasy qyzmet etti.
Bókeı ordasy aýdanynda 9 141 saılaýshy tirkelgen. Saılaý ýchaskeleriniń barlyǵy kerekti qural-jabdyq, ınternet jelisi qamtylǵan. Múmkindigi shekteýli 366 saılaýshyǵa arnaıy jasaqtalǵan kabınalarda daýys berý úshin jaǵdaı jasaldy. Aýdandyq aýmaqtyq saılaý komıssııasy bergen málimetke qaraǵanda, Bókeı ordasyndaǵy saılaýshylardyń eń úlkeni 97 jasta bolsa, 107 saılaýshy alǵash ret daýys berý jasyna jetken.
Tasqala aýdanynda da saılaý qalypty jaǵdaıda ótti. Aýdandaǵy 22 saılaý ýchaskesiniń beseýi aýdan ortalyǵy Tasqala kentinde ornalasqan. Munda 11 myńǵa jýyq saılaýshy óz tańdaýyn jasaýy tıis bolǵan. Aýdandyq aýmaqtyq saılaý komıssııasy taratqan málimetke qaraǵanda, mundaǵy saılaý barysyn Amanat partııasynan – 22, respýblıkalyq «Daýys» qoǵamdyq birlestiginen – 22, «Namys» qoǵamdyq uıymynan – 20, «Aqjol» partııasynan 8 ókil baqylady.
Qaratóbe aýdandyq aýmaqtyq saılaý komıssııasynyń tóraǵasy Baqytjan Júsipqalıevtiń málimetinshe, aýdanda 5565 saılaýshy daýys bergen. Bul óńirde tirkelgen barlyq saılaýshynyń 63,3 paıyzy.
Qaratóbe aýdanyndaǵy barlyq ýchaskede saılaý barysyn «Jarııa» qoǵamdyq birlestigi ókilderi tolyq baqylaǵan bolatyn. Qaratóbe aýylyndaǵy №277 saılaý ýchaskesinde bolǵan Klara Baıbýlova ózi baqylaǵan ýchaskede zań buzýshylyq bolmaǵanyn aıtady.
Bul saılaýǵa qoǵamdyq birlestikter, memlekettik emes uıymdar tarapynan da qyzyǵýshylyq zor boldy. Ǵaısa Qapaqovtyń aıtýynsha, saılaý barysyn qadaǵalaý úshin úsh aýdandaǵy saılaý ýchaskelerinde 310 baıqaýshy tirkelgen kórinedi.
- Túrli saıası partııalardan, qoǵamdyq uıymdardyń atynan kelip, tańnan keshke deıin búgingi saılaýdy baqylaǵan azamattar az bolǵan joq. Bul baıqaýshylar – bizdiń kómekshilerimiz. Saılaýdyń ashyq, zańǵa sáıkes ótýine úles qosqany úshin biz olardyń bárine rızashylyq bildiremiz, - dedi Ǵaısa Hamıdollauly.
Komıssııa tóraǵasynyń aıtýynsha, aýdan ákimderin tikeleı tańdaý ótken bul saıası úrdis elimizdi úlken demokratııalyq ózgeristerge bastaıtyn alǵashqy qadam. «Bizdiń 12 aýdanymyz bar. Birte-birte olardyń bárinde de halyqtyń ózi tańdaǵan basshylar keledi. Bolashaqta bolatyn úlken saılaýlarǵa tamasha tájirıbe boldy. Ásirese bul saıası naýqanǵa aýyl azamattarynyń erekshe kózqarasy, belsendiligi bizdi qýantyp otyr. Búgin tuńǵysh halyqtyq saılaýǵa túsip, márege aldymen jetken jeńimpazdarymyz ómirge basqasha stıl, ózgeris alyp kelse eken, halyqtyń tikeleı tańdaýymen kelgen qyzmetinde jemisti eńbek etip, aýdannyń kórsetkishin jaqsy jaqqa ózgertse eken dep tileımiz. Dál osylaı bolsa, búgingi saılaýdyń basty jeńisi sol bolmaq», deıdi Ǵaısa Qapaqov.
Batys Qazaqstan oblysy