Sybaılas jemqorlyqqa qarsy qyzmet sońǵy 10 aıdaǵy jumys nátıjesin qorytyndylady, dep habarlaıdy Egemen.kz atalǵan vedomstvonyń baspasóz qyzmetine silteme jasap.
Jyl basynan beri óńirlerde barlyǵy 215 laýazymdy tulǵa áshkerelendi, onyń 137-si basshylar.
Jemqorlyqqa ushyraǵan memlekettik qyzmetshilerdiń eń kóp sany Almaty, Shymkent qalalary men Almaty, Shyǵys Qazaqstan, Túrkistan, Aqmola, Abaı jáne Jetisý oblystaryna tıesili.
Esepti kezeńde ártúrli salalarda sybaılas jemqorlyq táýekelderine 180-ge jýyq taldaý jáne monıtorıng júrgizildi.
Jalpy, sońǵy 10 aıda Qazaqstanda 1500-ge jýyq jemqorlyq qylmys tirkeldi, 1100-den astam adam áshkerelendi, onyń 158-i túrli deńgeıdegi basshylar bolyp shyqty.
Vedomstvo ókilderiniń aıtýynsha, sotqa 1 myńnan astam is jiberildi, olar boıynsha 282 mlrd teńgeni quraǵan zalal tolyq óteldi.
«2021 jyldan bastap bıýdjetke jáne kvazımemlekettik sektor sýbektilerine shamamen 857 mlrd teńge somaǵa múliktik aktıvter men aqshalaı qarajatty qaıtarý qamtamasyz etildi. Onyń ishinde 159,8 mlrd teńgesi sheteldik ıýrısdıksııalardan túsken aqsha qarajaty túrinde. Bul soma memleket bıýdjetine tústi. Máselen, Avstrııadan 36,8 mlrd teńge, Lıhtenshteınnen 116,7 mlrd teńge, Birikken Arab Ámirlikterinen 6,3 mlrd teńge, Túrkııadan 253 mln teńge qaıtaryldy», delingen resmı aqparatta.
Zańsyz satyp alynǵan aktıvterdi qaıtarý boıynsha jumys áli de jalǵasyp jatqanyn aıta ketý kerek.
Memlekettik satyp alý portalynyń monıtorıngi barysynda Antıkor qyzmetkerleri 38 mlrd teńgeden astam shyǵyndardyń aldyn aldy.
«Elimizdiń oblystarynda sybaılas jemqorlyq táýekelderiniń kartasyn iske asyrý sheńberinde jalpy bıýdjeti 2,44 trln teńgeni quraıtyn 156 áleýmettik nysan belgilendi. Olardy jymqyrýǵa jol bermeý maqsatynda qurylys barysyna monıtorıng júrgiziledi. Bul proseske jurtshylyq ta qosylǵan. Jalpy, halyqtyń jemqorlyqqa qarsy belsendiligi artyp keledi. Máselen, osy jyldyń tamyz aıynda iske qosylǵan «Sybaılas jemqorlyqqa qarsy volonterlik» jobasyna 2 myń beı-jaı qaramaıtyn azamat qatysyp jatyr», dep qosty agenttik.