Byltyr qarashada Atyraýdaǵy gaz-hımııa kesheni iske qosylǵan edi. Keshenge amerıkalyq «Lummus Technology Inc» kompanııasynyń «Catofin» jáne «Novolen» tehnologııalary ornatylǵan. Osyǵan uqsas keshender kóp emes. Álemniń Saýd Arabııasy, AQSh, Belgııa, Ońtústik Koreıa jáne Qytaı sekildi bes elinde ǵana bar.
KRI JShS basqarma tóraǵasy-bas dırektory Danııar Tıesovtiń aıtýynsha, keshende «Teńiz» ken ornynan jetkizilgen shıkizattan jylyna 500 myń tonna polıpropılen shyǵarý josparlanǵan. Bul – álemdegi polıpropılen óndirisiniń 1 paıyzyn quraıtyn ári Qazaqstandaǵy munaı-gaz ónerkásibin órkendetýge septigi tıetin osyndaı ónimdi shyǵaratyn alǵashqy keshen.
Degenmen bıyl maýsymda keshen jóndeýge toqtatyldy. Bas dırektor Danııar Tıesov munyń sebebin paıdalanýdyń birinshi jylynda kezdesetin qalypty tájirıbe retinde túsindirdi. О́ıtkeni gaz-hımııa kesheniniń jumysyn toqtatý osyndaı iri kásiporyndarda kezdesip turady. Keshenge «Siemens» kompanııasy ornatqan jylý almastyrǵyshtan aqaý baıqalyp, týrbınaǵa sý aqqan.
Keıin keshende josparly jóndeý jumystary júrgizilip, qaıtadan iske qosyldy. Keshende byltyrdan beri polıpropılenniń PP N 030, PP N 120 markalaryn shyǵarý isine 631 adam tartylǵan. Daıyn ónim óz tutynýshylarymyzdan bólek, Túrkııa, Qytaı, Eýropa elderi men Reseı Federasııasyna eksporttalady.
KRI JShS óndiris jónindegi dırektory Bolat Ábdýálıevtiń aıtýynsha, keshende polıpropılenniń jańa markasyn óndirý bastaldy. Jańa ónimniń markasy – PP H031 BF/7 dep atalatyn bıaksıaldy plenka. Jańa ónimnen tamaq jáne kúndelikti turmysta qoldanylatyn taýarlarǵa arnalǵan polımerli plenka qaptamalaryn, etıketka men skotch taspasyn óndirýge bolady. BOPP plenkasy joǵary tosqaýyldyq qasıeti bar, tózimdi ári adam densaýlyǵyna zııansyz. Polıpropılenniń PP H031 BF/7 markasynan fotosýretterdiń syrtyn qaptaıtyn, keńse taýarlary men gúlderdi oraýǵa arnalǵan plenkalar jasalady.
«Biz óndirip jatqan PP H031 markasyna elimizden de, shet memleketterden de suranys joǵary bolyp tur. О́ıtkeni bul – tyǵyz ári sapaly ónim. Jańa ónim jergilikti kompanııalardyń suranysyn tolyq ótep, ımportqa táýeldiligin joıýǵa múmkindik beredi. Bir aptada jańa markanyń 1000 tonnasy óndirildi», deıdi Bolat Ábdýálıev.
Atyraý oblysy