Densaýlyq saqtaý mınıstri el azamattaryn qyzylshaǵa qarsy qosymsha ımmýndaý sharalaryna qatysýǵa shaqyrdy. Qazirgi ýaqytta Qazaqstanda, sondaı-aq álemniń kóptegen elinde qyzylsha aýrýyna qatysty qolaısyz epıdemıologııalyq jaǵdaı qalyptasyp otyr, dep habarlaıdy Egemen.kz.
Infeksııa juqpaly, ol aýa tamshylary arqyly tez taralady. Sońǵy eki aıda elimizde syrqattanýshylar sany kúrt ósti.
Bıyl 13 myńnan astam adam qyzylsha juqtyrǵan. Onyń 83%-y balalar, negizinen 5 jasqa deıingiler. Olardyń 70%-y ekpe almaǵan. Naýqastardyń arasynda ekpe almaǵan eresekter de bar.
Infeksııanyń taralýynyń artýy saldarynan Qazaqstanda qosymsha jappaı ımmýndaý júrgizý týraly sheshim qabyldandy.
Ol qańtar aıynyń sońyna deıin jalǵasady. Mınıstrdiń aıtýynsha, vaksına jetkilikti.
«Vaksınalaý mártebesi joq balalarǵa, ınfeksııa oshaqtarynda bolǵan eresekterge ekpe egemiz. Barshańyzdy aýrýdan saqtaný úshin emhanaǵa shaqyramyz», dedi Ajar Ǵınııat.Densaýlyq saqtaý mınıstri ınfeksııalyq aýrýdyń saldaryn da nazarǵa saldy.
«Búgingi tańda qyzylsha vırýsynyń ózine tán emi joq, sondyqtan mundaı qaýipti ınfeksııadan qutylýdyń jalǵyz joly ekpe egý bolyp otyr. Vaksınanyń ózinen qoryqpaý kerek, ol tekserilgen. Biz ony jyl saıyn ulttyq egý kúntizbesine sáıkes qoldanamyz», dep túıindedi Ajar Ǵınııat.