Máskeýdegi Qazaqstan elshiliginde ekinshi dúnıejúzilik soǵysta qaza tapqan Qazaqstan jaýyngeriniń súıegin tapsyrý rásimi ótti, dep habarlaıdy Egemen.kz.
Atalǵan elshiliktiń baspasóz qyzmetiniń habarlaýynsha jaýyngerdiń medalonynda saqtalǵan jazba arqyly onyń Qyzylorda oblysyna qarasty Qazaly aýdandyq áskerı komıssarıatynan áskerge shaqyrylǵany, 144-atqyshtar dıvızııasynyń 785-atqyshtar polkiniń quramynda soǵysqany, 1912 jyly týyp, 1941 jyldyń 7 qarashasynda Máskeýdi qorǵaý kezinde qaza tapqany, jaýyngerdiń aty-jóni Seılan Mámetov ekeni anyqtalǵan.
Atalǵan sharada Qazaqstannyń Reseıdegi elshisi Dáýren Abaev: «Sol kezdegi adamdardyń erligi týraly estelik otandastarymyzdyń júreginde máńgi qalady, kitaptarda, ánderde, monýmentterde, memorıaldarda, murajaılar ekspozısııalarynda jáne kóshe ataýlarynda beınelenedi», dep atap ótti.
Seılan Mámetovtiń týystary áli tabylǵan joq. Jaýynger súıegi Qazaqstanǵa jetkizilip, áskerı qurmetpen jerlenedi.