Aýyr atletıkadan Meksıkanyń Gvadalahara qalasynda jastar arasynda ótip jatqan álem birinshiliginde Qazaqstan qurama komandasynyń qorjynyna alǵashqy júlde tústi.
81 kg salmaq dárejesinde baq synaǵan Edige Emberdi asqan sheberlik tanytyp, astekter elinde elimizdiń ánuranyn shyrqatty. Áýeli ol 145 kg ziltemirdi julqyp kóterse, serpe kóterýde 191 kılogramdy eńserdi. Qossaıystyń qorytyndysy – 336 kg. Bir aıta keterligi, jattyǵýdyń alǵashqy túrinen keıin Emberdi toǵyzynshy orynǵa turaqtaǵan edi. Sol kezde onyń júldeli oryn úshin talasatynyna eshkim senbedi. Desek te qazaqtyń qaısar uly ekinshi jattyǵýda janyn salyp, qarsylastarynyń barlyǵyn shań qaptyryp ketti. Serpe kóterýde eshkim ony mańaılaı alǵan da joq. Sóıtip, Edige jastar arasynda álem chempıony atandy.
Kúmis medaldi túrikmenstandyq Ǵaıǵysyz Torev ıelendi. Ol qandasymyzdan bir kg ǵana kem kóterdi. Qola júldeni grýzııalyq Saba Asanıdze ıelendi. Onyń nátıjesi – 333 (149+184) kg.