Kezinde UFC-de óner kórsetken Jalǵas Jumaǵulovtyń álemniń eń beldi promoýsheninde joly bolmaǵany belgili. 2020-2023 jyldar aralyǵynda jeti márte oktagonǵa shyqqan ol alty ret jeńilis tapty.
Elge oralǵan qazaq faıteri otandyq «Naıza» promoýsheni uıymdastyratyn týrnırlerinde kúsh synasýǵa bel býdy. 6 jeltoqsanda Astanada Jalǵas Iаgo «Pıtbýl» Rıbeıromen aıqasýǵa tıis edi. Biraq ótken aptanyń sońynda Brazılııa sportshysynyń kózine operasııa jasatqan eken. Sol sebepti de ol elordadaǵy jarysqa qatyspaıdy. Joǵarydaǵy jaǵdaıdan qulaǵdar bolǵan bette uıymdastyrýshylar Rıbeırony dereý japonııalyq Masata Nakamýramen almastyrdy. 26 jastaǵy Kúnshyǵys eli ókiliniń aralas jekpe-jekti serik etkeli bes jyldan asty. Sol aralyqta 16 kezdesý ótkizip, 9 ret jeńiske jetti. Sonyń úsheýinde ǵana Nakmýra aıqyn basymdyq tanytty. Negizinen ol Japonııadaǵy eń beldi uıymdardyń biri – DEEP-te óner kórsetti.
35 jastaǵy Jumaǵulov 2014 jyldan beri 23 jekpe-jek ótkizip, 14 ret mereıi ústem boldy. Segiz saıysty qazaq faıteri merziminen buryn aıaqtady. Bir ókinishtisi, sońǵy tórt básekede ol qarsylastaryna jol berdi.