Shaıbaly hokkeıden kelesi jyldyń 12-14 qańtary aralyǵynda ótetin Qurlyqtyq kýboktiń fınaldyq bóligine joldama alǵan barlyq komanda anyqtaldy.
Irikteý týrnırinde Astananyń «Nomady» da qatysqan edi. Olar barlyq kezdesýde jeńiske jetip, E tobynda kósh bastady. Osy kórsetkish arqyly myqtylarmen kúsh synasý múmkindigine ıe boldy. Elordalyq hokkeıshiler endi fınaldyq týrnırde Ulybrıtanııanyń «Kardıff Devılz», Polshanyń «Katovıse» jáne Danııanyń «Hernıng Blıý Foks» klýbtarymen kúsh synasady. Ázirge bul matchtardyń qaıda ótetini áli anyqtalǵan joq.
Osy oraıda Respýblıkalyq shaıbaly hokkeı federasııasynyń basshylary jarysty Qazaqstanda uıymdastyrýǵa nıet bildirip otyrǵanyn aıta ketken jón. Eger bul usynys qoldaý tapsa, onda Qurlyqtyq kýboktiń sheshýshi oıyndaryn «Barys Arenadan» tamashalaımyz.