Astana polıseıleri kólikten 9 mln teńgesi bar sómkeni urlaǵan jolaýshyny ustady. Jeke taksı júrgizýshisi Nura aýdandyq polısııa basqarmasyna júginip, ishine atalǵan somadaǵy teńge salynǵan sómkeniń joǵalǵanyn habarlaǵan, dep jazady Egemen.kz Polisia.kz saıtyna silteme jasap.
Ol qosymsha aqsha tabý úshin dosynyń Toyota Camry avtokóligin alyp otyrǵan. Aqsha salynǵan rıýkzakty salonda dosy umyt qaldyrǵanyn ol bilmegen.
Taksıge bir túnde 17 adamnyń otyrǵany belgili bolǵan. Qıyn ári muqııat jumys barysynda polıseıler jolaýshylardy jetkizgen barlyq mekenjaılardy anyqtaǵan. Beınekameralardy qaraý barysynda joǵalǵan sómkeni qolyna ustaǵan er adam kózge shalynǵan.
30 jastaǵy jolaýshy túnde taksı salonynda oryndyqtan rıýkzakty kórip qalyp, kerek mekenjaıǵa jetkende, bótenniń múlkin qolyna ile ketken.
Qazirgi ýaqytta jolaýshyǵa qatysty sotqa deıingi tergeý amaldary júrgizilip, elorda aýmaǵynda buryn jasalǵan osyǵan uqsas qylmystarǵa onyń qatystylyǵy tekserilip jatyr.