Atyraý oblysynda qınalǵan janǵa qaıyrymdylyq kórsetip júrgen eriktiler az emes. Oblys ákimi apparatynyń basshysy Nurlybek Jeńisbekulynyń aıtýynsha, qazir 57 volonterlik top pen qaı isti de erinbeı atqarýǵa qulshynyp turǵan 712 erikti tirkelgen.
«Volonterler ásirese pandemııa kezindegi ahýaldy jeńildetýge kóp úles qosty. Qazir ár salada erikti bolyp, meıirimdilik pen jaýapkershiliktiń úlgisin kórsetip júrgender kóp. Olardyń barlyǵy qaıyrymdylyq is-sharalaryna qatysyp, qarttarǵa, kópbalaly, az qamtylǵan otbasylarǵa qol ushyn sozady. Bul – kópke úlgi bolatyn is», deıdi Nurlybek Jeńisbekuly.
Al oblystyq «Azamattyq ortalyq» KMK basshysy Janat Dosqalıevanyń aıtýynsha, túrli volonterlik uıymmen, jastar resýrstyq ortalyqtarymen, qala men aýyldardaǵy volonterlik klýbtarmen tyǵyz baılanys ornaǵan. Sondaı klýbtyń qatarynda «28 ilmek» te bar. Qazir bul klýbtyń quramynda 50-ge jýyq erikti toptasqan. Olar 11 jyldan beri shala týǵan nárestelerge taza júnnen kıim toqyp berip júr.
Bul óńirdegi tanymal eriktiniń biri – Arman Qasymov. Munaı-gaz kompanııasynda qarjyger mamandyǵymen jumys isteıdi. Biraq 12 jyldan beri bos ýaqytyn jedel járdem dárigerlerimen birge ótkizip keledi. Bastapqyda sanıtar bolǵan. Keıin jedel járdem kóligin jýǵan. Qazir ol naýqastarǵa júrek-ókpe reanımasııasyn, kardıogramma jasaýdy úırenip alǵan.
«Jaqynda volonterlik uıymdardyń jumysyna qoldaý kórsetý úshin «Demeý» baıqaýy uıymdastyryldy. Onyń qorytyndysymen úzdik tanylǵan 5 joba ıesine 500 myń teńgeden berildi. Biz eriktiler qatarynan aǵa býyn ókilderin de kóbirek kórgimiz keledi. О́ıtkeni erikti bolý úshin jas shekteýi joq. Qazir 50 jastan asqan adamdar arasynda «Kúmis volonterlikti damytý» jobasy qolǵa alyndy. Jobanyń basty maqsaty – aǵa býyn ókilderi arasynda bastamashyl toptar qurý, áleýmettik máselelerdi sheshýge járdemdesý, qaıyrymdylyq, ekologııalyq is-sharalardy uıymdastyrý, urpaqtar sabaqtastyǵyn arttyrý. Aldyńǵy býyn ókilderiniń ózin-ózi damytýyna, belsendi bolýyna yqpal etý, salamatty ómir salty úshin qolaıly jaǵdaılar jasaý. Bul joba aıaqtalǵanymen, qart kisiler jańa dostar tapty. Osy joba arqyly bir-birin unatyp, úılengender de bar», deıdi J.Dosqalıeva.
Baıqaýǵa qatysqan Ásııa Quljanovanyń jobasy joǵalǵan adamdardy izdestirýge arnalǵan. Ol jetekshilik etetin «Batys» volonterlik tobynyń eriktileri iz-túzsiz joǵalyp, habarsyz ketken jandardyń sýreti men deregin ilip, izdeý jumysyn júrgizedi. Máselen, Atyraý oblystyq polısııa departamentiniń basshysy Nurhat Orazbaevtyń málimetinshe, jyl basynan beri joǵalǵan adamdardy izdestirý jumystaryna 5 myńnan astam erikti jumyldyrylǵan. Volonterlik top 40-tan astam jasóspirimniń aman-esen tabylýyna atsalysqan.
Taǵy bir erikti Arman Arapbekov munaıly shahardaǵy mektepterdiń aýlasyna jemis aǵashtaryn egýdi qolǵa alǵan. «О́mirge qushtar» jobasynyń bastamashyl toby erekshe kómekti qajet etetin jáne turmysy tómen otbasylardyń balalarynyń úıirmelerge tegin barýyna kómektesedi. Al «Asa qajet» jobasynyń eriktileri Isataı aýdanyndaǵy mekteptiń birine usaq motorıkany damytýǵa arnalǵan quraldar ákelip berdi. «Er júrektiler» uıymyna birikken jastar «Úıden bir qadam» jobasy aıasynda Mahambet aýdanyndaǵy Saraıshyq qalashyǵyna bir kúndik týr uıymdastyryp júr.
Atyraý oblysy