M.Tóregeldın atyndaǵy Jezdi taý-ken jáne balqytý isi mýzeıinde kóptegen jádiger bar, sonyń biri – shógen doby.
Shógen degen ne? Bul qazir kópshilikke «polo» degen atpen tanymal oıyn túri. Túp tamyry túrki dalasynan bastaý alǵan oıyndy saıahatshy Marko Polo aǵylshyn eline alyp baryp, sodan álemge «polo» ataýymen tarap ketse kerek.
Bir ǵajaby, bul oıyn eshqaıda joǵalyp ta ketpegen. Bálkim, elimizdiń barlyq aımaǵynda bolmasa da, bertinge sheıin Ulytaý – Qarsaqbaı jaǵynda oınalǵanǵa uqsaıdy. О́ıtkeni shógen dobyn mýzeıge Ulytaý aýdany Bozdaq aýylynyń turǵyny Myrzahan Salahov esimdi azamat 1989 jyly tapsyrǵan eken.
– Bul dopty mýzeıge tapsyrǵanda Myrzahan aǵamyz «Muny bozbala kezimizde aýylda at ústinde júrip oınaıtynbyz. Myna dopty maǵan anam kezinde sıyrdyń júnine qyl qosyp istep bergen. Jún jumyrlanyp domalaq bolý úshin arasyna asyq salǵan edi. Qazirgiler shógen oınamaıdy. Úıde jatqansha, eldiń kórgeni, bilgeni durys» degen bolatyn. Mine, sodan beri shógen dop osynda tur, – deıdi mýzeıdiń bas qor saqtaýshysy Zıbagúl Nurmaǵanbetova.
Ulytaý oblysy