Rýdnyıda kezekte turǵan 40 otbasy páter kiltterin aldy. Elimizdiń bas merekesi – Táýelsizdik kúni qarsańynda qýanyshqa kenelgen turǵyndardyń arasynda 15 jyl boıy baspana kezeginde turǵandar bar.
Qala basshylyǵy kópshiliktiń qaqaǵan aıazda tońyp qalmaýyn oılasa kerek, saltanatty rásim paıdalanýǵa berilgen turǵyn úıdiń janyndaǵy Jastar resýrstyq ortalyǵynyń májilis zalynda ótti.
Qala turǵyndary qonystanǵan páterlerdi qala ákimdigi jeke kompanııadan satyp alyp otyr. Onyń ishinde úsh bólmeli 8, eki bólmeli 32 páter bar. 96 sharshy metrlik keń páterlerge kópbalaly otbasylar qonystandy. Al eki bólmeli páterlerge jalǵyzbasty analar, jetimder men múmkindigi shekteýli jandar ornalasty.
Atalǵan kópqabatty turǵyn úı buryn jataqhana bolǵan. Toqsanynshy jyldary qańyrap bosap qalǵan tórt qabatty ǵımarat kúni búginge deıin kádimgideı qalanyń shyraıyn buzyp tur edi. Bos ǵımaratty bıyl sáýirde «Qazaqstan Construction Holding» seriktestigi satyp alyp, qaıta jańǵyrtý jumystaryn bastap ketken. Nátıjesinde, aınaldyrǵan 6-7 aıdyń kóleminde eski ǵımarat 46 páteri bar sý jańa bes qabatty turǵyn úı bolyp jasanyp shyǵa keldi.
«Aldaǵy ýaqytta osy úıdiń joǵary qabatyndaǵy páterlerdi de satyp alǵymyz keledi. Oǵan áleýmettik jaǵdaıy tómen otbasylar qonystanatyn bolady. Rýdnyıda jeke ınvestorlar osyndaı birneshe bos turǵan ǵımaratty jóndeýden ótkizip jatyr. Turmystyq jaǵdaıy tómen otbasylardy baspanamen qamtamasyz etý maqsatynda ol úılerdi de satyp alýǵa nıet etip otyrmyz», deıdi Rýdnyı ákiminiń orynbasary Valerıı Poleshko.
Jergilikti atqarýshy bılik atalǵan páterlerdiń bir sharshy metrin 240 myń teńgeden arnaıy konkýrs arqyly satyp alǵan. Páterdiń bári jaldamaly. Jekeniń menshigine berilmeıdi.
Qala turǵyndaryn baspana qýanyshymen quttyqtaı kelgen oblys ákimi Qumar Aqsaqalov 40 adamǵa qyryq páterdiń kiltin ustatty.
«Jyl basynda biz Rýdnyıda kezinde turǵyn úı qyzmetin atqarǵan, keıin biraz jyl boıy bos turyp qalǵan 11 kópqabatty ǵımaratty qaıta qalpyna keltiremiz dep ýaǵdalasqan edik. Bıyl 7 ǵımaratta qaıta jańǵyrtý jumystary júrip jatyr. Jyl sońyna deıin taǵy eki turǵyn úı paıdalanýǵa berilip, baspana kezeginde turǵan 231 otbasy jańa páterge kiretin bolady», dedi oblys ákimi.
Baspana qýanyshyna ıe bolǵandardyń ishinde arba bıinen sport sheberi, tórt dúrkin Qazaqstan chempıony Iýlııa Kalınına da bar. Iýlııa – I toptaǵy múgedek. Úı kezegin 10 jyl kútipti. Boıjetip qalǵan qyz balasyn tárbıelep otyrǵan sport sheberi birinshi qabattaǵy eki bólmeli páterge qonystandy. «Buǵan deıin úshinshi qabattan páter jaldap turdyq. Ol úı tipti qolaısyz edi, lıftisi joq. Qyzym tómen túsip, joǵaryǵa shyǵaryp alatyn. Syrtta kóp kútip otyryp qalatyn kezderim de az bolǵan joq. Al Táýelsizdik merekesi qarsańynda memleket berip jatqan jańa páterim birinshi qabatta. Kireberisinde pandýsy bar, múmkindigi shekteýli jandardyń kirip-shyǵýyna qolaıly jaǵdaı jasalǵan. Biz sekildi kemtar jandarǵa qaraılasyp, janashyr bola bilý de izgi qoǵamnyń, kemel eldiktiń belgisi», deıdi Iýlııa.
Qostanaı oblysy