Qaǵazda qatyp turǵanymen...

Kúz jaýyndy-shashyndy bolǵanymen, maıtońǵysyz jyly edi. Bıylǵy qys shybynsyz jaz sııaqty jyly bolady dep joramal aıtatyn sáýegeıler kóbeıgen. Áıtse de, tylsym syryn ishine búkken tabıǵattyń qylt etpe tosyn minezi kóp. Jeltoqsan týysymen kún kúrt sýytty. Aldymen Stepnogor qalasynyń jylý júıesinde apat oryn alyp, kóńildi kúpti etken. Ile oblys ortalyǵyndaǵy R.Sabataev, B.Áshimov, M.Ǵabdýllın, E.Serkebaev kósheleriniń qıylysyndaǵy jylý júıesinde oqys oqıǵa oryn alyp, onnan astam kópqabatty turǵyn úı jylýsyz qaldy. Sol kúnderi aýa temperatýrasy -40 gradýsqa taıap qalǵan. Jylýsyz qalǵan úı turǵyndary ton jamylǵanymen, tońazyp tań atyrdy.

Aldymen Stepnogor qalasyndaǵy apat týraly aıta ketelik. Jaýapty mekemeniń málimetinshe, jeltoqsannyń 7-si kúni tún ortasy aýa jylý qubyry jarylyp, apat saldarynan jeti myńǵa jýyq tutynýshysy bar úsh birdeı shaǵyn aýdan jylýsyz qalǵan. Apattyń saldaryn joıyp, bar jumysty qalpyna keltirý úshin tozyǵy jetken jylý júıeleriniń ıesi «Stepnogorsk teplotranzıt» seriktestigi 30 adam men 6 birlik tehnıkany jumyldyryp, jantalasa jumys istedi. Jeltoqsannyń 8-i kúni apat saldary birtindep joıylyp, jylý júıesin sýmen toltyrý jáne osy ýaqytqa deıin tońyp, jaý­rap otyrǵan shaǵyn aýdan turǵyndarynyń úılerine jylý berý bastaldy. Ákimdik bergen aqparatqa sensek, qazirgi kúni jaǵdaı qalypty. Bir esepten Stepnogor qalasynyń jylý júıesiniń tozyǵy ábden jetkendigi, bul taraptaǵy istiń jaıyn biletin maman kadrlardyń tapshy ekeni týraly ótken jyly el gazeti – «Egemende» jarııa etken bolatynbyz. Jalǵyz biz ǵana emes, buqaralyq aqparat quraldarynyń kópshiligi ulardaı shýlaǵan. Memleket tarapynan qyrýar qarjy bólindi. Janashyrlyq jasalmady dep ókpeleýdiń jóni joq. Memleket basshysy Qasym-Jomart Toqaevtyń ózi tikeleı tapsyrma berip, Úkimet qorynan 2 mıllıar­d teńge qarajat baǵyttaldy. Keıin jaýapty jergilikti basshylar tarapynan kóńilge senim uıalatatyn sertke bergisiz aqparat ta aıtyldy. Qaqaǵan aıaz kelgenshe qaǵazda bári qatyp tur edi.

«Jyǵylǵanǵa judyryq» degendeı, Stepnogor qalasyndaǵy shý basyla bergende, Býrabaı baýraıynda taǵy bir biteý jaranyń ózegi jarylyp, shý shyqty. Aýdan ákimi Araı Sadyqov áleýmettik paraqshasynda mán-jaıdy túsindirip, jazba jarııalady. Belgilisi, jeltoqsannyń 3-i kúni Shýchınsk qalasynyń №12 qazandyǵyndaǵy mazýt quıylǵan sısternanyń qabyrǵasynda 32 mıllımetrlik jaryq paıda bolǵan. Osy jaryqtyń saldarynan syzdyqtap aqqan mazýt jylý júıesine qosylyp ketken. Sonyń áserinen qoımaljyń tartqan sý qospasy jylý qazandyǵyna jaqyn ornalasqan nysandaryn ishki jylý júıesin túgel bitep tastamaǵanymen, ystyq sýdyń kidirissiz ótýine múmkindik bermeıtin deńgeıge jetken. Ystyq sý ótpegennen keıin bes kóppáterli turǵyn úı men №8 mektep-gımnazııasy jylýsyz qalǵan.

– Bul qazandyq Stansıonnyı shaǵyn aýdanyn, Býrabaı kýrortty stansasyn, temir jol kásiporyndaryn jylýmen qamtamasyz etedi. Qazirgi ýaqytta «Jańa turmys 2020» seriktestigi №8 mektep-gımnazııanyń jylý júıesin mazýt qosylǵan qoımaljyń sýdan tazartyp jatyr. Qazirgi ýaqytta jylý júıesiniń sýy tazaryp keledi, – deıdi aýdan ákimi Araı Serikbaıuly, – búgingi tańda jylý qalypty berile bastady.

Endi asa bir mańyzdy máselege kóńil aýdaralyq. Bıylǵy jyly jylý maýsymyn oıdaǵydaı ótkizý úshin bıýdjetten qyrýar qarajat qarastyrylyp, onyń ishinde kommýnaldyq kásiporyndarǵa energııa resýrstaryn satyp alýǵa 9,8 mıllıard teńge bólingen bolatyn. Oblystyq turǵyn úı-kommýnaldyq sharýashylyǵy basqarmasynyń málimetine qaraǵanda, jekemenshik turǵyn úı ıeleri 685 myń tonna kómir daıyndaǵan. Al jylda paıdalanatyny bir mıllıon tonnaǵa jýyq. Demek áli de qyrýar kómir qajet. Al jylytý maýsymyna qajetti mazýt týraly aıtatyn bolsaq, kommýnaldyq qyzmetterdiń qoımasynda 7 496 tonna mazýt bar. Keregi 62 myń tonna. Aıyrmashylyǵy kózge uryp tur.

Ala jazdaı aıtylǵan aqparattardyń qanshalyqty shyndyqqa janasatyndyǵyn jeltoqsannyń alǵashqy kúnderindegi aıaz bas­tan jaqty aıyrǵandaı etip kórsetip berdi. Tegi jalǵan aqparat jarǵa jyǵady deıtin aqıqatshyl sóz shyn-aý táıiri.

Aqmola oblysy