2024 – 2026 jyldarǵa arnalǵan respýblıkalyq bıýdjet týraly zańda 2024 jylǵy 1 qańtardan bastap memlekettik járdemaqylar men bazalyq zeınetaqy tólemderiniń barlyq túrin QR Ulttyq Banki aıqyndaıtyn ınflıasııanyń boljamdy deńgeıine sáıkes 7 %-ǵa, yntymaqty zeınetaqyny – 9 %-ǵa, ıaǵnı ınflıasııa deńgeıinen 2%-ǵa ilgerilep arttyrý kózdelgen. Bul týraly QR Eńbek jáne halyqty áleýmettik qorǵaý mınıstrligi habarlady, dep jazady Egemen.kz.
2024 jyly bıýdjetten tólenetin jıyntyq zeınetaqynyń ortasha mólsheri (BJZQ tólemderin eseptemegende) 130 414 teńgeni quraıdy (2023 jyly – 120 838 teńge).
«Budan basqa, Memleket basshysynyń tapsyrmasy boıynsha 2023 jyldan bastap bes jyl ishinde eń tómen bazalyq zeınetaqyny eń tómen kúnkóris deńgeıiniń 70%-na deıin, eń joǵary – 120%-ǵa deıin jyl saıyn kezeń-kezeńimen arttyrý júzege asyrylady.
Máselen, 2024 jylǵy 1 qańtardan bastap bazalyq zeınetaqynyń eń tómen mólsheri eń tómen kúnkóris deńgeıinen 60%-dan 65%-ǵa deıin ulǵaıtylatyn bolady, bul 28 215 teńgeni quraıdy, eń joǵary mólsheri eń tómen kúnkóris deńgeıinen 100-den 105%-ǵa deıin arttyrylyp, 45 578 teńgeni quraıdy», delingen vedomstvo habarlamasynda.
2024 jylǵy 1 qańtardan bastap memlekettik járdemaqylardyń ulǵaıýynyń birneshe mysaly:
- 1, 2, 3 balanyń týýyna beriletin járdemaqy 131 100 teńgeden 140 296 teńgege deıin, 4 jáne odan da kóp bala týýyna beriletin járdemaqy – 217 350 teńgeden 232 596 teńgege deıin ulǵaıady;
- mólsheri balalar sanyna baılanysty kópbalaly otbasylarǵa beriletin járdemaqy 4 balasy bar otbasylar úshin 55 304 teńgeden 59 183 teńgege deıin, 10 balasy bar otbasylar úshin – 138 000 teńgeden 147 680 teńgege deıin ulǵaıady;
- I top múgedektigi bar adamdarǵa arnalǵan járdemaqy 89 248 teńgeden 95 496 teńgege deıin, II top – 71 398 teńgeden 76 397 teńgege deıin, III top – 48 681 teńgeden 52 089 teńgege deıin ulǵaıtylady.
Sondaı-aq Memlekettik áleýmettik saqtandyrý qorynan (budan ári – MÁSQ) asyraýshysynan aıyrylý jáne eńbekke qabilettiliginen aıyrylý boıynsha tólemder 7%-ǵa ulǵaıtylady. Atalǵan tólemder mindetti áleýmettik saqtandyrý júıesine qatysýshylarǵa bıýdjetten beriletin memlekettik járdemaqylarǵa qosymsha júzege asyrady.
Tólemderdiń mólsheri jeke-jeke jáne mynalarǵa baılanysty bolady: sońǵy 2 jylda MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffısıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty almastyrý.