Sulý ánge adal bolyp ótken Seıil júrektiń damyldaǵanyna bir jyl. Alty ishekti gıtarasyn qolyna alyp, «Tań samalynan» bastap, tek esti ánderdi shyrqaıtyn Seıilin eli shyn peıilimen saǵynǵan eken. Muny Qaraǵandy oblysy ákimdiginiń qoldaýymen ótken qazaqtyń aıaýly ánshisi Seıil Aıaǵandy eske alýǵa arnalǵan «Sulý án, saǵan adalmyn!» atty keshke jınalǵan qaýymnyń qarasynan ańǵardyq. Jańa Maıqudyq mádenıet úıiniń konsert zalyna kelgen kórermen syımady. Tik turyp tamashalady. Al bul – shyn talantqa kórsetilgen taǵzym, án qudiretine kórsetilgen qurmet.
Kesh shymyldyǵy «Tań samalyn» shyrqaǵan Seıil Aıaǵannyń beınebaıan úzindisimen túrildi. Sahnaǵa kóterilgen «Araı» kvarteti ándi jalǵady.
Aqyn Serik Saǵyntaıdyń «Arqadan Seıil ketti, Serjan qaldy», dep aıaqtalatyn óleńi bar. Seıil qazaqtyń búgingi Ámiresi atanǵan Serjan Musaıyn baýyrynyń talantyn shyn peıilimen baǵalady. Sol kúmis kómeı baýyry Ilııa Jaqanovtyń «Bulbul edi» ánin shyrqady.
Seıildiń mezgilsiz qazasynan soń áleýmettik jelide túrli sherli óleńder jarııalandy. Arqanyń bir top aqyny ánshiniń ǵajap bolmysyn sózben sýrettep, joqtady. Keshte Serik Aqsuńqaruly, Qoılybaı Asan, Tilegen Ádilov, Serik Saǵyntaı, Rýslan Nurbaı, Qaırat Asqar, Sultan Dáýlethan, Aıbek Baıtóre óleńderin tebirenispen oqydy.
Dástúrli ánniń dúldúlderi Erjan Bazarbek «Sýret syryn» shyrqasa, Dáýrenbek Árkenov «Meńdi qyz» ánin tamyljyta oryndady.
Seıildiń án-qorjyny baı edi. Arqanyń qos juldyzy Amangeldi men Zaǵypran «Tańǵy tilegin», Erjan Naımanbaı «Saǵynyshym meniń» ánin, Araılym Júkenova «Jiberilgen hatyn», Shyńǵys Sársenbaı «Án-dombyrasyn», Erbol Alshynbaı «Bal sezimin» shyrqady. Munyń bári de Seıildiń súıikti ánderi edi.
Keshke Alataý tórinen aıaýly dosy, óner juldyzy Roza Álqoja keldi. Ádemi dýet bolyp, ásem án shyrqaǵan kezderin saǵynǵanyn áýenmen jetkize bildi. О́nerdegi aǵasyna arnap shyǵarǵan «Seıil-júrek» ániniń tusaýyn kesti.
Murat Qońyr, Baqytjan Rahymjanov, Saıan Muzdybaı, Seıil Boqaev syndy ánshi dos, baýyrlary da sahna tórinen tabylyp, kórermendi ánmen terbedi.
Ǵajap ánshi «Jas qalamymen» kópshiliktiń júregine jol tapqan edi. Repertýaryndaǵy bul ánniń de shoqtyǵy sózsiz bıik. Kezinde osy ánge beınebaıan túsirip, «Youtube» jelisinen 5 mıllıonnan asa qaralym jınaǵan edi. Keshti osy ánmen túıindegen tanymal ánshi jup Qýanysh pen Gúlzar kórermendi ornynan turǵyzyp, qol soqtyrdy.
«Seıildi sonaý toqsanynshy jyldardan beri aǵa retinde, dos retinde, ónerpaz retinde biletin edik. Ánshiniń mezgilsiz qazasy bárimizdiń júregimizge batty. Seıildiń ekinshi ómiri bastaldy dep jatyr. Aǵamyzdyń ánnen basqa aıtar áńgimesi joq-tyn. Ánge, ónerge adal edi. Qaıda júrse de án ǵana aıtatyn. Jaqynda turǵan úıine eskertkish taqta ornattyq. Keler jyly respýblıkalyq «Seıil salǵan ánder-aı...» atty óner keshin josparlap otyrmyz. Seıildiń ánderin jınaqtap, albom etip shyǵarý oıymyzda bar. Seıildiń izin basqan shákirtteri aman bolsyn», dep jyly lebizin bildirgen oblys ákiminiń orynbasary Erlan Qusaıyn ánshiniń asyl jary Qymbat Túsipbekova men aıaýly ánshi Roza Álqojanyń ıyǵyna eldiń atynan qamzol japty.
«Seıil aǵamyzdy eske alý keshi – ánshiniń shyǵarmashylyǵyn nasıhattaýdyń bastaýy. Keler jyly kóktemde án festıvalin ótkizbekpiz. Ánshi aǵamyzdyń barlyq ónerdegi dostaryna rızashylyq bildiremiz. Barlyǵy atsalysty. Kómek qolyn sozdy. Syrym Hordın men Meıramgúl Seıilhanqyzy da keshimizdi ádemi tizgindep berdi», deıdi keshti uıymdastyrýshy Ashat Qajytaı.
«Bul Seıil – tiri qalǵan Oǵyzyńdaı, Gıtara – Qorqytyńnyń Qobyzyndaı», dep bastalady aqyn, Memlekettik syılyqtyń ıegeri Serik Aqsuńqarulynyń «Seıildiń gıtarasy» atty óleńi. Osy bir óleń jolynan-aq Seıil ánshiniń aty ańyzǵa aınalatynyn ońaı ańǵarýǵa bolady.
Kópshilik keshten «Shirkin-aı, Seıil salǵan án qandaı!» dep qımaı tarqasty...
Qaraǵandy oblysy