Ulttyq statıstıka bıýrosynyń deregine sáıkes, 2023 jyldyń qańtar-qyrkúıek aralyǵynda elimizge 834,9 myń sheteldik týrıst saıahattaǵan. 2022 jylǵy kórsetkishpen salystyrǵanda 225 myń adamǵa artqan. Iаǵnı byltyr elimizge qydyryp kelgen týrıster qatary 37% kóbeıgen, dep habarlaıdy Egemen.kz Ulttyq statıstıka bıýrosyna silteme jasap.
«2022 jyly elimizge 609,8 myń sheteldik kelgen. Statıstıkalyq málimetter boıynsha, elimizge saıahattaıtyn sheteldik týrısterdiń geografııasy jyl sanap artyp keledi. Máselen, Qazaqstanǵa jaqyn kórshilerimizden bólek, muhıttyń arǵy betindegi memleketterdiń de saıahtashylary kóptep kele bastady. Osy oraıda, nazarlaryńyzǵa 2023 jyldyń qańtar-qyrkúıek aralyǵynda elimizge saıahattaǵan TOP-5 eldiń týrıster sanyn usynamyz. 2023 jyldyń alǵashqy 9 aıynda elimiz boıynsha eń kóp saıahatshy – Reseı Federasııasynan kelgen. Byltyrǵy qańtar-qyrkúıek aralyǵynda Qazaqstanǵa 356 850 myń reseılik saıahattaǵan. Ekinshi oryndy Qytaı týrısteri ıelendi. Shyǵystaǵy kórshimizden elimizge 75 131 adamnyń tabany tıgen. Al úshinshi satyǵa Túrkııa týrısteri turaqtady. Anadoly elinen 41 134 týrıst kelgen. Sondaı-aq úzdik bestiktiń qataryna Úndistan (34 757) jáne AQSh (28 160) saıahatshylary endi», delingen aqparatta.
Týrızm jáne sport vıse-mınıstri Erjan Erkinbaev 2022 jyly 600 myńnan asa saıahattaýshy elimizge kelgenin, byltyrǵy jyldyń toǵyz aıynda 800 myńnan asa týrıst kórikti mekenimizdi tamashalaǵanyn aıtty.