29 aqpan men 12 naýryz aralyǵynda Italııada bokstan lısenzııalyq týrnır ótedi. Ár salmaqta jartylaı fınalǵa shyqqan boksshylar Parıj Olımpıadasynyń joldamasyn qaltaǵa salady.
Osy oraıda, qurama komandanyń bas bapkeri Myrzaǵalı Aıtjanov lısenzııa sarapqa salynatyn jarysqa kimder qatysatynyn aıtty.
«Olımpıadaǵa irikteý týrnırine eldegi sońǵy Spartakıadanyń jeńimpazdary qatysady. Alty boksshyny jarysqa qosamyz. Al Azııa oıyndarynda joldama máselesin sheship qoıǵan Qamshybek Qońqabaevty jattyǵý jıynyna jiberýdi oılastyrdyq», dedi M.Aıtjanov.
Qazaqstan boks federasııasynyń atqarýshy dırektory Azız Qojambetov tek qana 63,5 kg-da tańdaý bolatynyn jetkizdi.
«Bul salmaqta Ertýǵan Zeınýllınov pen Muhammedsabyr Bazarbaıulynyń bireýi barýy múmkin», dedi ol.