О́tken jyly jasandy ıntellekt salasyna qatysty sózder eń kóp qoldanysta bolǵan eken. Jyl jańalyǵynyń biri de múmkindigi kóp chat-bottyń ázirlenýi boldy. Qazirgi kezde neırojeliniń kúndelikti ómirimizge dendep enip kele jatqany ár saladan baıqalady. Endi jasandy zerdeniń járdemimen jumysshy izdegender de, jumys izdegender de ońaı taba alady.
Eńbek jáne halyqty áleýmettik qorǵaý mınıstrligi elektrondy eńbek bırjasy portalynda jumys izdeýshiler men jumys berýshiler úshin bos oryndar men túıindemeler boıynsha usynymdardy sáıkestendirip, júıeleýge múmkindik beretin jasandy ıntellekt modelin iske qosty. Neırojeli atalǵan mınıstrliktiń aqparattyq júıeleriniń deregimen arnaıy oqytylǵan. Bul júıe LinkedIn Recruiter izdeý jáne usynystar júıesine uqsas ozyq tásilmen ázirlengen.
Túıindemeler men bos jumys oryndarynyń mazmunyn tıimdi taldaýǵa múmkindik beretin tabıǵı tildi óńdeý modelderi eki taraptyń da jumysyn edáýir jeńildete túsedi. Atalǵan mehanızm jumys berýshilerge jumysqa qabyldaý jáne kadr rezervin qalyptastyrý úshin laıyqty kandıdattardy jyldam jáne dál izdeýdi qamtamasyz etse, al jumys izdeýshilerge óziniń talaptaryna sáıkes keletin bos jumys oryndaryn tezirek izdep tabýǵa múmkindik beredi.
Qysqasy, jasandy ıntellekt barlyq túıindemeniń mazmunyn jaqsy túsinedi. Ol jerde jazylǵan jalaqy mólsheri, turǵylyqty jeri, kóshý múmkindikteri, daǵdylary sııaqty ártúrli talapty eskere otyryp, jumys izdeýshige eń qolaıly nusqalardy usynyp otyrady. Dál solaı jumys berýshilerge de laıyqty usynystar beredi.
Eńbek jáne halyqty áleýmettik qorǵaý mınıstrliginiń málimetinshe, aldaǵy ýaqytta neırojeliniń jumysy odan ári jetildiriledi. Mashınalyq oqytý algorıtmderiniń jumysyn jaqsarta otyryp, ótinish berýshilerge qosymsha bilim berý qyzmetin qosý josparda bar.