AQSh-tyń Iýta shtatynda (Solt-Leık-Sıtı) konkımen júgirýden ótip jatqan tórt qurlyq chempıonatynda Qazaqstan erler quramasy kúmis júldege ıe boldy.
Týrızm jáne sport mınıstrligi Sportty damytý dıreksııasynyń baspasóz qyzmeti málim etkendeı, komandalyq sprıntte elimizdiń erler quramasy kúmis júldeger atandy.
Altaı Járdembekuly, Evgenıı Koshkın, Nıkıta Vajenın men Artýr Galıev (rezervte) kvarteti chempıon atanǵan Kanada quramasynan 3,17 sekýnd qalyp, ekinshi orynǵa taban tiredi. Al úzdik úshtikti Ońtústik Koreıa konkıshileri túıindedi.
Aıta keteıik, bıyl atalǵan dodaǵa segiz memleketten kelgen 80-ge jýyq sportshy synǵa túsip jatyr. Búgin sheshýshi jarys kúni erler men áıelder arasynda iz kesý, jekeleı syndaǵy 100 metr men mass-start jarysy ótedi.
Jalpy, tórt qurlyq chempıonaty degen Eýropadan basqa qurlyqtaǵy memlekettiń sportshylary synǵa túsetin jyl saıynǵy doda.