Elimizdegi mektepterde kitaphana qorynyń tolyq sıklderin qamtamasyz etetin «Qazaq mura» júıesi iske qosyldy. Biregeı joba oqýshylardyń kitap oqý daǵdysyn qalyptastyrýǵa múmkindik beredi.
«Qazaq mura» ásirese kórkem ádebıet qory az aımaqtardaǵy kitaphanalarǵa úlken syı bolmaq. Memleket basshysy Qasym-Jomart Toqaev: «Qazir elimizdegi mektep kitaphanalarynda 130 mıllıonnan asa kitap bar. Biraq ondaǵy kórkem ádebıettiń úlesi mardymsyz. Shyn máninde, kitap oqıtyn el zııaly ultqa aınalady. Biz jas urpaqtyń kitapqa qushtarlyǵyn oıatýymyz kerek», dep «Balalar kitaphanasy» jobasyn júzege asyrýdy tapsyrǵan. Platforma osy bastamanyń aıasynda Ulttyq kitap palatasymen ıntegrasııalanyp iske asyp otyr. Ol aýqymdy kitap qoryna tegin ári shekteýsiz qol jetkizýge múmkindik berip qana qoımaı, barlyq mektepten aqparat jınap, naqty derekti de usynady.
Bilim berý men sıfrlyq ınnovasııalardy damytýdaǵy jańa qadam otandyq baǵdarlamashylardyń arqasynda júzege asyp jatyr. Platformany ázirleýshiler tobynyń jetekshisi Muqataı Máliktiń aıtýynsha, sıfrlyq kitaphana júıesin daıyndaýǵa 3 jyldan asa ýaqyt jumsalǵan.
– Kitaphana salasyn sıfrlandyrý qazirgi bilim berýdegi zamanaýı baǵyt. Búgingi tańda elimizde kitaphana qory týraly tolyq aqparat joq. Sondyqtan elimizdegi mektep kitaphanalarynyń jumysyn sıfrlandyrý men avtomattandyrýǵa baılanysty birqatar is-sharany iske asyrý qolǵa alyndy. Iаǵnı kitaphanashylar ǵana emes, oqyrmandar, baspalar jáne bilim basqarmasy men mınıstrlik ókilderi de júıege qosyla alady. Platforma kitaphana aqparatyna negizdelgen qujat aınalymy jumysyn ońtaılandyryp, kitaphana qoryn basqarýǵa múmkindik beredi, – dedi joba avtory.
Jańa júıe kitaphanashylardyń jumysyn avtomattandyryp qana qoımaı, «Oqu» mobıldik qosymshasyn usynady. Ol oqýshylarǵa álemdik klassıkany túpnusqada ǵana emes, sonymen qatar qazaq tilinde de tegin oqýǵa múmkindik beredi. Atalǵan qosymshada ár oqýshy kez kelgen kitapqa tapsyrys berip, onyń qorda bar-joǵyn da teksere alady.
«Qazaq mura» sıfrlyq kitaphanasy qalalar men aýyldardaǵy kitaphana ınfraqurylymynyń jetilmegen máselelerin sheshýge baǵyttalǵan. Nátıjesinde, kitaphana qorynyń aınalymyndaǵy kitaptardyń barlyǵynyń elektrondy nusqasy qoljetimdi bolady. Bul óskeleń urpaqty kitap oqýǵa yntalandyryp, mádenı muranyń saqtalýyna da septigin tıgizbek. Búginde bul júıege Almatynyń birqatar mektebi qosylyp úlgergen. Sıfrlandyrý jobasy endi elimizdiń basqa da aımaqtaryn qamtymaq.