«Barmysyń, baýyrym?» radıo habarynyń júrgizýshisi, týǵan anasyn izdep júrgen belgııalyq azamat Eddı Jan Savelevtiń Qazaqstandaǵy zańdy ókili, jýrnalıst Qymbat Dosjan bala satýǵa baılanysty qozǵalǵan qylmystyq istiń nelikten qysqartylyp qalǵanyn aıtty, dep jazady Egemen.kz.
«Suraýy bar» ıýtýb arnasynda jarııalanǵan suhbatynda Qymbat Dosjan 20 jyl buryn Arqalyq qalasynan belgııalyq áıelge satylǵan Jánibek-Eddı Jan Savelevtiń jazǵan aryzy boıynsha qozǵalǵan qylmystyq is birden qysqartylǵanyn jetkizdi.
«2002 jyldyń 17 qańtarynda Qostanaı oblysy, Arqalyq qalasynyń perzenthanasynda ómirge kelgen Jánibektiń tegi Jumaǵulov bolǵan. Perzenthanada anasy «balamnan bas tartamyn» dep eshqandaı aryz jazbaǵan. Bir aptadan keıin «úı-jaıymdy rettep keleıin» dep anasy perzenthanaǵa tastap ketedi-mis. Jánibektiń anasy qolhatty medısına qyzmetkeriniń aıtýymen jazǵan. Perzenthana basshysynyń atyna Jánibektiń anasynyń «úıime baryp keleıin» dep suraný maqsatynda jazǵan qolhatyn da taptyq.
Polısııa qyzmetkerleri «salǵyrttyq» babymen qylmystyq isti 5 qańtar kúni qozǵady, prokýratýra ókilderi «mundaı bapqa saı emes, arada 20 jyl ótti» dep qylmystyq isti 13 qańtarda qysqartyp otyr. Maǵan qaýlysyn da jiberdi», dedi jýrnalıst.
Eddı Jan Savelevtiń zańdy ókili Qymbat Dosjan «salǵyrttyq» baby boıynsha qylmys quramy joq dep qysqartylǵan isten keıin Bas prokýror Berik Asylovtyń atyna aryz jazyp, «kámelettik jasqa tolmaǵan balany shetelge asyrý» baby boıynsha qylmystyq is qozǵaýdy suraǵanyn aıtty.