Eki jáne úsh jastarynda Qaraǵandydaǵy «Malıýtka» balalar úıinen AQSh-qa jol tartqan Rýslan men Álııanyń ómiri qazir túbegeıli ózgergen, dep habarlaıdy Egemen.kz.
«Sheteldegi qazaq balalary» baǵdarlamasynyń málimetinshe, olar 1999 jyly týǵan jeriniń shekarasyn tárk etken. Balalardyń týǵan áke-shesheleri bólek.
Olardyń asyrap alǵan ákesi - Frenk.
- AQSh-tan bala asyrap alýǵa 8 otbasy bardyq. 6 otbasy 2-3 baladan asyrap alǵan. Tek 2 otbasy bir baladan aldy, - deıdi ol.
50 jastan asqanda bala asyrap alǵan olar qazir 70 jasta. О́z balalary joq. О́mirde bar jıǵan-tergenin qazaq balalarynyń aýyzyna tosqan.
- Ekeýin asyrap alǵan soń, kóp nárse ózgerdi. Olar bizdiń ómirimizdi mánge toltyrdy. Bala asyrap almaǵanda, ómirimiz tym súreńsiz bolar edi. Týǵan kúnin toılaǵan sekildi biz olardy asyrap alǵan kúnimizdi mereke qyp toılaımyz. Biz olardy asyrap alǵanymyzdy, qaı jerde týǵanyn aıtyp ósirdik, - dedi erli-zaıyptylar.
Búginde ata-anasynan bólek turatyn 26 jastaǵy Rýslan:
- Bala kezimde kóp adam maǵan aıanyshpen qarady. Bir músápir sekildi kórdi. Biraq men eshqashan asyrap alǵan bala bolǵanyma ókingen emespin. Meniń ata-anam keremet adamdar. Olar álemdegi eń jaqsy adamdar. Men úshin bárin istedi. Eshqashan ózimdi ógeı sezingen emespin, - dep aǵynan jaryldy.
Rýslan pysyq, belsendi bala bolǵan. Qazir de bir ýaqytta birneshe sharýa atqaryp júre beredi. Ol óziniń bala kezde ashýlanshaq bolǵanyn aıtady.
Ol – motosıkl aıdaıdy. Quzǵa órmeleıdi. Regbıden bapker. Iýta shtaty boıynsha regbıden erler quramasynyń múshesi. Bir jyl buryn jeke kompanııasy bolǵan. Qazir regbı kıimderin satatyn kompanııa ashýǵa daıyndalyp júr. Iýta ýnıversıtetinde krımınalıstıka boıynsha medısınalyq daıyndyq kýrsyn oqyp júr. Ol hırýrg bolýdy armandaǵan. Qazir quldyqqa qarsy kúresý maqsatynda krımmınologııa salasyn tańdaǵan. Ol adamdardy quldyqtan bosatqysy keledi.