Jetisýda 336 jalpy bilim beretin mektep bar, onda 129 myńnan astam oqýshy oqıdy. Búginde 1708 bala shaǵyn eldi mekenderden qatynaıtyndyqtan olarǵa tasymaldaý uıymdastyrylǵan. Soǵan saı 67 kólik qyzmet kórsetedi. Kúni keshe jergilikti bıýdjet esebinen taǵy 5 sý jańa avtobýs berildi, dep jazady Egemen.kz.
Oqýshylardyń jan-jaqty damýyna, sapaly bilim alýyna jaǵdaı jasaý men olardyń qaýipsizdigin qamtamasyz etý basty nazarda. Osy aıtylǵan oıǵa sáıkes óńirimizdegi 5 aýdanǵa jańa avtobýstar tabystaldy.
Jańa avtobýstardyń kiltin tabystaǵan oblystyq bilim basqarmasynyń basshysy Marat Súleımenov sý jańa kólikpen qamtamasyz etilip jatqan mekeme basshylaryn quttyqtady. Sóz arasynda ótken jyly shalǵaı eldi mekenderdegi balalardy tasymaldaý úshin respýblıkalyq bıýdjetten 53,4 mln teńgege 7 avtobýstyń lızıngke alynǵanyn atap ótti. Sonymen qatar bıylǵy jyly berilip jatqan 5 avtobýs jergilikti bıýdjet esebinen 223 mln teńgege alynyp otyrǵanyn málimdedi.
«Bul kúni 24 oryndy 5 avtobýs tabystaýdamyz. Olar Aqsý, Alakól, Eskeldi, Qaratal, Kóksý aýdany mektepterine beriledi. Anyqtap aıtsaq Aqsý aýdany Iý. Gagarın atyndaǵy orta mektebine Qyzyljar aýylynan, Alakól aýdany Terekti orta mektebine Taldybulaq, Úshbulaq aýyldarynan, Eskeldi aýdany Balpyq bı atyndaǵy orta mektebine Teńlik, Terekti, Bókterli aýyldarynan, Qaratal aýdany Q. Baıseıitov atyndaǵy orta mektebine Aıdar aýylynan, Kóksý aýdany №12 orta mektebine Aınabulaq stansysynan, Kemertoǵan aýyly razezdinen oqýshylardy tasymaldaıdy», deıdi M.Súleımenov.
Barlyq avtobýs ıntellektýaldy avtomatty qaýipsizdikti tekserý, oqýshylardy salonda qaldyrýdyń aldyn alý júıesimen, eki qaýipsizdik beldigi bar oryndyqtarymen, salonnyń artqy jaǵynda ashylatyn avarııalyq shyǵý esigimen, sanıtarııalyq-epıdemıologııalyq qondyrǵymen jabdyqtalǵan.
Is-sharada Aqsý aýdandyq bilim bóliminiń basshysy Aıdynbek Jeksembaev oqýshylardy quttyqtady.
«Aqsý aýdany boıynsha 38 jalpy bilim beretin mektep bar. Onyń 27-si orta, 7-ýi ortalaý, 4-ýi bastaýysh mektep. Bizdiń aýdanda 5 mektepten oqýshylar tasymaldanady. Bul kúni 4 mektebimizde jańa avtobýstar bar, tek Sýyqsaı aýylyndaǵy Gagarın atyndaǵy orta mektebindegi kóligimizdiń jyly eskileý bolatyn. Bilim basqarmasy bizdi qoldap, mine, jańasyn aldyq. Qýanyshymyzda shek joq. Oblys ákimdigine, oblystyq bilim basqarmasyna Aqsý aýdanynyń azamattarynyń, halyqtyń atynan alǵysymyzdy aıtamyz. Osy kólikti balalardyń ıgiligine barynsha paıdalanamyz», deıdi A.Jeksembaev.
Jetisý óńirinde 32 bastaýysh mektep bar bolsa solardyń ońtaılandyrý jumysyn oblystyq bilim basqarmasy tolyqtaı qolǵa alyp otyr. Oblys ákimi bekitip bergen arnaıy jol kartasy boıynsha bastaýysh mektepterde oqıtyn oqýshylardy negizgi jáne orta mektepterge tasymaldaý jumystaryn uıymdastyrady. Sol úshin jergilikti bıýdjetten qosymsha taǵy da 10 avtobýs alýǵa qarajat bólingen. Endi ár aýdan ózderi kólik satyp alady. Osylaısha bıylǵy jyly tasymaldaý máselesi tolyǵymen sheshimin tappaq.