Qazaqstannyń joǵary oqý oryndarynan túlep ushqan jas mamandar jumys izdeýge orta eseppen 79 kún jumsaıdy. Bul týraly QR Ǵylym jáne joǵary bilim mınıstrligine qarasty Ǵylym jáne joǵary bilim salasyndaǵy sapany qamtamasyz etý komıtetiniń tóraǵasy Ádilet Toıbaev aıtty, dep habarlaıdy Egemen.kz.
Mınıstrliktiń málimetinshe, 2023 jyly JOO túlekteriniń 77 paıyzy jumysqa ornalasqan.
«Jumyspen qamtýdyń ortasha deńgeıi 2023 jyly 3,3%-ǵa ósip, 82,8%-dy qurasa, 2021 jyly bul kórsetkish 78,4%-dy, 2022 jyly – 79,5%-dy qurady. Al jumys izdeýdiń ortasha uzaqtyǵy - 79 kún, ıaǵnı 2,64 aı», dedi Ádilet Toıbaev Ortalyq kommýnıkasııalar qyzmetinde ótken brıfıngte.
Ol búgingi tańda jumys berýshilerdiń joǵary oqý oryndarynyń bilim berý baǵdarlamalarynyń sapasy men ózektiligine qanaǵattanýy artqanyn atap ótti.
«Jumys berýshiniń qanaǵattanýy 67,5 paıyzdy quraıdy. Bes jyldaǵy dınamıka 35%-dy qurady, óıtkeni 2019 jyly ózektilik 33%-dy qurady. Bul jaqsy nátıje», dedi ol.
Vedomstvonyń habarlaýynsha, bilim berý baǵdarlamalarynyń 91 paıyzy jumys berýshilermen kelisilgen, oqý prosesine praktık mamandar tartylǵan.
Sonymen qatart bilim berý baǵdarlamalarynyń 94%-y tanylǵan akkredıtteý agenttikterimen akkredıttelgen, bul da sapanyń artqanyn rastaıdy.