Belgili rejısser Erkin Raqyshev aqpan aıynda «Jaraly sezim 2» fılmi jaryqqa shyǵatynyn málimdedi, dep habarlaıdy Egemen.kz.
«Meniń ómirim» baǵdarlamasyna suhbat bergen rejısser-ssenarıst aldymen bul mamandyqty ınternetten meńgergenin jasyrmady.
- Qudaı maǵan kıno túsire alatyn talant beripti. Alǵash ret kıno túsirý úshin qarajatym bolmady. Úıimdi kepilge qoıyp, nesıe alǵanmyn. Áıelim qatty qoryqty. Sodan keıin meniń atyma eshqandaı jyljymaıtyn múlik jazbaıtyn boldy. Nesıe alǵannan soń endi ne bolaryn múlde bilmedim. Sóıtip júrip «Jaraly sezim» fılmin túsirdik. Jobany aıaqtaǵannan keıin aqshasyn shyǵaryp alýdy oılamadym. Basty armanym men maqsatym – rejısser bolý. Jalpy, ózim elge belgili adamdarmen óte kóp aralasqanmyn. Sondaı jandardyń biri – sol kezdegi qala ákimi bolǵan Imanǵalı Tasmaǵambetov, - dedi Erkin Raqyshev.
Ol eks-sheneýniktiń «Jaraly sezim» fılminiń shyǵýyna qosqan úlesi zor ekenin atap ótti. Kıno túsirý úshin úıin jalǵa alýǵa ruqsat etken.
- Odan keıin fılmniń tusaýkeserin jasaǵanda 300 dollar bergeni esimde. Bir kúni tusaýkeserge kerek qural-jabdyqtaryn alyp kelgen jigit: «Myna fılmdi bizdiń kınoteatrda kórseteıik, kúnine bir adamnan 100 teńge berip otyramyn» dep usynys tastady, men basynda túsinbeı, artynan kelistim. Birinshi kúni kınoǵa 7 adam keldi, men 700 teńge aldym. Oılansam, bılet quny 800 teńge, meniń alatynym 100 teńge, ekinshi kúni 25, úshinshi kúni 30 adam keldi. Kınony men túsiremin, biraq paıdanyń kóp bóligin basqa adam alady. Bul durys emes qoı dep oılanyp, jańaǵy jigitpen sóılesip, 50/50-ge bólip, aqshamdy shyǵaryp aldym. Sol kezde rejısser bolamyn dep túbegeıli sheshim qabyldadym, – deıdi áýesqoı rejısser.