Altaıdyń qoınaýyndaǵy orta mektepke sonaý Amerıkanyń ustazdary sabaq berýge kelgen. Shyǵystyń qıyryndaǵy aýylǵa qaıdan tap boldy deımiz ǵoı. Sóıtsek, Katonqaraǵaı aýylyndaǵy S.Lastaev atyndaǵy orta mektep ujymy AQSh-tyń Massachýsets tehnologııalyq ınstıtýtynyń «Global Teaching Labs» atty baǵdarlamasyna qatysýǵa nıet bildirip, kóp uzamaı atalǵan ınstıtýttyń eki úzdik stýdenti Aleksandr Edýard Sherstnev pen Hanna Park «Aýyl mektebi» jobasy aıasyndaǵy baǵdarlama boıynsha mektepke kelip, dáris bere bastaǵan.
Aıta keteıik, «Aýyl mektebi Powered by NIS» jobasynyń qatysýshysy – S.Lastaev atyndaǵy orta mektebi bul baǵdarlamaǵa engen aýyl mektepteriniń ishindegi ázirge alǵashqy bilim uıasy. «Global Teaching Labs» baǵdarlamasy aıasynda Massachýsets ınstıtýtynyń aldyńǵy qatarly stýdentteri jyl saıyn Eýrazııa elderindegi mektepterden is-tájirıbeden ótýge attanady. 9 qańtardan Massachýsets tehnologııalyq ınstıtýtynyń eki úzdik stýdenti S.Lastaev atyndaǵy orta mektepke kelgen. Amerıkalyq stýdentterdiń josparynda oqýshylarǵa belgilengen pánder boıynsha sabaq berý ǵana emes, olarmen jáne ustazdar ujymymen baǵdarlamalaý negizinde toptyq jumys júrgizý de bar. Qos stýdent Katonqaraǵaı aýylyndaǵy mektepte bir aıǵa jýyq baǵdarlamalaý, fızıka, aǵylshyn jáne aqparattyq tehnologııadan sabaq beredi.
– Men ekinshi, Hanna úshinshi kýrsta oqımyz. Negizgi mamandyǵym – fızıka pániniń muǵalimi. Dosym Hanna bolsa, kompıýterlik dızaın boıynsha bilim alyp jatyr. Bul bizdiń «Global Teaching Labs» baǵdarlamasy aıasynda ózge elge jasaǵan alǵashqy saparymyz. Atalǵan baǵdarlamaǵa qatysýǵa ózimiz nıet bildirdik. Qazaqstan týraly osy ýaqytqa deıin syrttaı ǵana bilip keldik. Ýnıversıtette oqıtyn Qazaqstannan kelgen qurby, dostarymyz da joq emes. Sondyqtan bolar osy elge qyzyǵýshylyǵymyz aýyp turdy, – deıdi Aleksandr Edýard Sherstnev.
Olardy Astananyń áýejaıyna túse salysymen Bilim berýdi turaqty damytý qoryndaǵy dostary qushaq jaıa qarsy alyp, qonaqjaılylyq tanytqan. Ertesinde О́skemenge, odan ári Katonqaraǵaı aýylyna jetken. S.Lastaev mektebine kelgendegi maqsattary – ózderiniń bilimin, qarym-qabiletterin mundaǵy oqýshylarǵa úıretý, solarmen bólisý, aǵylshyn tiline degen qyzyǵýshylyqtaryn arttyrý. Eń bastysy, mektep oqýshylarynyń bilimge degen yntalaryn arttyrǵysy keledi.
– Oqýshylarǵa álemniń úlken ári tańǵajaıyp ekenin, olar óz múmkindikterin barynsha paıdalanyp, jarqyn jetistikterge jete alatynyn aıtqymyz keledi. Bári de ózderiniń qolynda. Ol úshin qazir barlyq jaǵdaı men múmkindik jeterlik, – deıdi Aleksandr Edýard Sherstnev.
Sheteldik stýdentter ózderine júktelgen pán sabaqtaryn aǵylshyn jáne orys tilderinde júrgizedi. Negizgi sabaqtardan bólek, Aleksandr men Hanna mektep ishinde uıymdastyrylatyn debat, pikirtalas alańdary, dóńgelek ústel sııaqty is-sharalarǵa qatysyp, oqýshylarmen tildik qarym-qatynas ornatyp júr. Mektep shákirtteri de amerıkalyq stýdentterdiń sabaqtaryna qyzyǵýshylyq tanytyp, aǵylshyn tilin meńgerýdegi tájirıbelerin arttyryp keledi.
Ámbege tanystyra keteıik, Aleksandr men Hanna Soltústik Amerıkanyń Kalıfornııa shtatynda týyp-ósken. Aleksandrdyń ulty – orys, Hanna – koreı qyzy. Aleksandrdyń ákesi Reseıdiń Chelıabi qalasynda týǵan eken. Aıtýynsha, Qazaqstanda buǵan deıin ózi bolyp kórmese de, týystarynyń keıbiri osynda áli kúnge deıin turady.
– Mektep oqýshylarynyń qazirdiń ózinde aǵylshyn tiline degen qyzyǵýshylyqtary joǵary. Sabaqta pikir almasamyz, áńgimelesemiz. О́zimiz de olardan qazaq tilin úırenip júrmiz. Qazirdiń ózinde «As bolsyn», «Saý bolyńyz», «Sálemetsiz be?» degen syndy sózderdi úırenip aldyq. Aýyldyń balalary jan-jaqty, bilimdi ekenine kózimiz jetip otyr. Bul bizdi qatty qýantady. Budan keıin de biz katonqaraǵaılyq oqýshylarmen jáne ustazdarmen únemi baılanysta bolamyz, – deıdi Hanna Park.
Amerıkanyń stýdentteri Altaıǵa kelgenderine shyn qýanyshty. Mundaı sulý tabıǵatty kórýdiń ózi baqyt desedi. Basa aıta keterligi, S.Lastaev mektebi Bilim berýdi turaqty damytý qory men «Nazarbaev zııatkerlik mektepteri» derbes bilim berý uıymynyń «Aýyl mektebi» birlesken jobasyna qatysyp otyrǵanyna bıyl besinshi jyl. 2019 jyly «Aıtas» holdınginiń qoldaýymen bul mekteptiń bilim berý kabınetteri jańartylǵan bolatyn.
Shyǵys Qazaqstan oblysy,
Katonqaraǵaı aýdany