Shet aýdanynyń Tómengi Qaıraqty aýylynda dárigerlik ambýlatorııa paıdalanýǵa berildi. Jańa jylda aýyldyń qýanyshyna aınalǵan jańa nysannyń ashylýymen aýdan basshysy Muhıt Muhtarov quttyqtap, óńirdegi áleýmettik-ekonomıkalyq damý jolyndaǵy densaýlyq saqtaý salasynyń mańyzyn atap ótti.
«Elimizde medısına mamandarynyń mártebesi men bedeli joǵary bolýy úshin barlyq jaǵdaı jasalyp jatyr. Memleket basshysy Qasym-Jomart Kemeluly densaýlyq saqtaý salasyna árdaıym aıryqsha kóńil bólip keledi. Medısınalyq qyzmettiń qoljetimdi bolýyn qamtamasyz etý, densaýlyq saqtaý ınfraqurylymyn odan ári jańǵyrtý úshin elimizde keshendi is-sharalar qabyldanyp jatyr. Prezıdent bastamasymen qolǵa alynǵan «Aýyldyq densaýlyq saqtaýdy jańǵyrtý» ulttyq jobasy aıasynda eldi mekenderde júzege asyrylǵan sharýalar az emes. Bul jobany iske asyrý shalǵaıdaǵy eldi mekenderde alǵashqy medısınalyq kómek kórsetý, sondaı-aq ortalyq aýdandyq aýrýhanalardy medısınalyq jabdyqtarmen tolyq jaraqtandyrý máselelerin sheshýge múmkindik beredi», dedi M.Muhtarov.
Jańa ambýlatorııa stomatologııalyq qurylǵymen, zerthanalyq, fızıoterapııalyq jáne EKG apparattarymen jabdyqtalǵan. Aldaǵy ýaqytta emdeý ornynda ambýlatorııalyq qyzmetten bólek jaraqat tańý pýnktin, shuǵyl medısınalyq kómek kórsetý kabınetterin ashý josparlanyp otyr. Mundaı ambýlatorııalar Shet aýdanynyń 7 eldi mekeninde salynyp, el ıgiligine berilip otyr.
Qaraǵandy oblysy,
Shet aýdany