Mindetti áleýmettik medısınalyq saqtandyrý qoryna (MÁMS) burynǵydan bes ese artyq aqsha aýdarylady degen jańalyqtyń anyq-qanyǵy belgili boldy, dep habarlaıdy Egemen.kz aqparat agenttigi.
KTK telearnasynyń jazýynsha, jarna bes eselep ósedi degen aqparatty qordaǵylar joqqa shyǵaryp otyr. Qordyń málimetinshe, tólemniń shekti mólsheri 10 eń tómengi jalaqydan 50-ge kóterilgen.
- Jarna tóleý bes esege artady degen joq, olaı emes. MÁMS-tiń jarnasy ózgergen joq. Qazirgi qoldanystaǵy zańda MÁMS-tiń jarnasyn tóleý úshin joǵarǵy deńgeı 10 eń tómengi jalaqyny quraıdy. Ol degen bıyl 850 myń. Sol deńgeı bes esege kóbeıtiledi. Iаǵnı 4 mıllıon 250 myń teńgege kóteriledi, – dedi Mindetti áleýmettik medısınalyq saqtandyrýdy úılestirý departamentiniń dırektory Aıan Muhametqalıeva.
Elimizde 850 myń teńgeden kóp jalaqy alatyndar sany 500 myńnan sál asady eken. Iаǵnı atalmysh ózgeris halyqtyń tek 9 paıyzyna ǵana qatysty. Qalǵany sol baıaǵydaı tabysynyń eki paıyzyn tóleı bermek.
Mysaly, 850 myń teńge jalaqy alatyn birinshi qyzmetker aıyna medısınalyq saqtandyrýǵa tabysynyń 2 paıyzyn, ıaǵnı 17 myń teńge tóleıdi. Al aıyna 3 mıllıon teńge jalaqy alatyn ekinshi qyzmetker de 17 myń teńge tóleıdi. О́ıtkeni eń joǵarǵy soma osyndaı. Endi kelesi jyldan bastap ózgeriske saı, aıyna 3 mıllıon teńge tabatyn qyzmetker tabysynyń 2 paıyzyn, ıaǵnı 60 myń teńge tóleıtin bolady. Mysaly, 4 mıllıon teńge tapsańyz, 80 myń teńge tóleısiz.
Qordaǵylar muny ádiletti deıdi. О́ıtkeni kóbirek aqsha tabatyn adam aılyǵy tómendermen birdeı jarnamen qutylmaýy tıis. Al qarjy salasynyń keıbir sarapshylary basqa pikirde. Qazir tabysy táýir adam aýyrsa, MÁMS arqyly emes, jekemenshik emhanalarǵa baryp emdeledi degen ýáj keltirdi.
- MÁMS-ke kóbirek tóleıtin adamdarǵa eshqandaı paıdasy joq. Jalaqyń kóp pe, kóbirek tóleısiń degen qaǵıdat ádiletsiz. Qorǵa qarajat qajet bolsa, nege ony halyq tóleý kerek? Sondaı-aq qor óziniń jınaqtarymen durys jumys istemeıdi. Ondaǵy aqshanyń qaıda jumsalyp, qaıda ketip jatqanyn biz bilmeımiz. Men ózim, mysaly, mindetti áleýmettik medısınalyq saqtandyrýǵa júginbeımin. Biraq jalaqymnan aı saıynǵy tólem ustalyp otyrady. Ne úshin tólep júrgenim túsiniksiz, – deıdi qarjy sarapshysy Andreı Chebotarev.
Densaýlyq saqtaý mınıstrligi osy jańashyldyqty engizý arqyly qorǵa jetpeı jatqan 243 mıllıard teńgeni toltyramyz dep aıtqan edi. Ekonomıster medısınalyq saqtandyrýdaǵy qarjy tapshylyǵyn joıǵan kúnniń ózinde de, asa bir ózgeriske ákelmeıdi dep otyr.