Buqar jyraý aýdanynyń ortalyǵy Botaqara kentinde 320 oryndyq zamanaýı Deneshynyqtyrý-saýyqtyrý kesheni paıdalanýǵa berildi. Endi kent jasóspirimderi sporttyń san alýan túrimen aınalysady.
Keshenniń ashylý saltanatyna oblys ákiminiń orynbasary Erlan Qusaıyn arnaıy qatysyp, 82 jastaǵy sport ardageri Vıktor Ýrkýnov jáne dzıýdodan halyqaralyq jarystardyń júldegeri Erǵanat Moldaǵulovpen birge jańa nysannyń lentasyn qıdy.
Jańa keshenniń paıdalanýǵa berilýi elimizde salaýatty ómir saltyn qalyptastyrýǵa aıryqsha nazar aýdarylǵanyn, buqaralyq sportpen shuǵyldanýǵa betburys baryn ańǵartady. Jasyratyny joq, buǵan deıin botaqaralyqtarǵa sportpen aınalysatyn jer jetispeı keldi. Sondaǵy eki jalpy bilim beretin jáne balalar men jasóspirimderdiń sport mektepteriniń zaldary únemi lyq toly bolatyn. Jastardyń, jalpy kent turǵyndarynyń sportqa degen yntasy zor. Mine, endi osy jańa keshenniń ashylýymen bul yńǵaısyzdyqtar joıylmaq.
6 300-den asa turǵyny bar kenttiń jas-kárisi jańa keshen ishinde san alýan sport túrimen aınalysady.
Respýblıkalyq, oblystyq jáne jergilikti bıýdjetterdiń qarjysyna salynyp, boı kótergen jańa ǵımaratta kúres jáne boks zaly, ústel tennısi, taǵy da basqa kabınetter bar. Jaqyn arada munda voleıbol, basketbol, shaǵyn fýtbol, ústel tennısi, shahmat seksııalary ashylyp, ulttyq sport túrlerin damytý da qolǵa alynady. Bolashaqta aýdannyń barlyq turǵynyn qamtý úshin atalǵan Deneshynyqtyrý-saýyqtyrý kesheniniń bazasynda sport klýbyn ashý da josparda tur. Keshenge kelýshilerdi ázirge 7 jattyqtyrýshy baptap, sportqa baýlysa, keleshekte shtat sany men seksııalar da kóbeıtiledi.
Saltanatty is-shara sońynan oblys ákiminiń orynbasary Erlan Beısembaıuly men Buqar jyraý aýdanynyń ákimi Abylaı Sultanǵalıev keshen ishin aralap kórdi. Jergilikti jas sportshylar jınalǵan jurt aldynda bozkilemde jattyǵý tásilderi men sheberlikterin kórsetti.
Qaraǵandy oblysy,
Buqar jyraý aýdany