Senat depýtaty Bıbigúl Jeksenbaı Facebook-tegi paraqshasynda Úkimet aldynda turǵan maqsattar týraly óz oıyn ortaǵa saldy, dep habarlaıdy Egemen.kz.
«Memleket basshysynyń Jarlyǵymen Oljas Abaıuly Bektenov Qazaqstan Respýblıkasynyń Premer-mınıstri qyzmetine taǵaıyndaldy. Oljas Bektenov – memleket saıasatyn júzege asyrýda tájirıbeli memlekettik qyzmetshi. Oljas Abaıuly zań salasynda da, sybaılas jemqorlyqqa qarsy is-qımyl jumysynda da nátıjeli qyzmet etti. Onyń bilimi mol, uıymdastyrý qabileti joǵary, salmaqty, adal, eńbekqor azamat. Sondyqtan da jańa qyzmeti men mindetin qaltqysyz oryndaıdy degen senim joǵary.
Memleket basshysy Qasym-Jomart Kemeluly Úkimetten aldaǵy ýaqytta batyl sheshimder men eldiń damýy úshin tyń serpin kerektigin qadap aıtty.
El Prezıdentiniń bastamalary halyq kútkendeı ýaqtyly júzege asýy - Úkimet pen jergilikti bılikke tikeleı baılanysty ekeni ras. О́tirik sandardy oınatyp, qurǵaq úádeler úıip-tógip júrýdiń ýaqyty ótti. Ár kún, ár aı sanaýly. Saılaýshylarmen kezdesýlerde bizden suraıtyn da naqty nátıje. Bizdiń Úkimetke depýtattyq saýal joldap, máselelerdi kóterýdiń de túp negizi sol. Bıýdjettiń ár tıyny únemdi paıdalanylýy men jemqorlyqqa jol berilmeýi qatal da, qatań baqylaý men shıraq qımyldy qajet etedi. Kásibı, iskerligi men eńbek ónimdiligi asa joǵary, bastysy baǵdarlama, jospar úshin emes, halyq úshin naqty qımyl jasaıtyn Úkimetke el zárý.
Osynaý jaýapty kezeńde Qazaqstan Úkimetin basqarý 26-shy Premer-mınıstr retinde qyryqtyń qyrqasynan asqan general-leıtenant Oljas Bektenovke buıyrdy. Qazaqta «qyryqta qamal alar» dep eń jaýapty jumysqa osy jasta baǵyttaý ejelden bar. Oljas Abaıuly ortalyq jáne oblystyq bılik organdarynda da tájirıbe jınap úlgerdi. Ár saladaǵy qyzmeti barysynda Memleket basshysyna adal, qatal da prınsıpshil basshy ekenin kórsetti .
Sybaılas jemqorlyqpen kúresý, zańsyz alynǵan aktıvterdi qaıtarý, Prezıdent tapsyrmalarynyń oryndalýyn qadaǵalaý boıynsha jaqsy nátıjeler baıqatty.
Prezıdent Ákimshiliginiń basshysy laýazymynda da basqarý júıesi jumysyn ońtaılandyryp, ony naqty nátıjelerge baǵyttaı alatyn kúshti jáne sheshýshi uıymdastyrýshylyǵymen kópshilik kózine tústi. Jańa Úkimet basshysy depýtattar aldynda sóılegen sózinde birneshe máselerdi qozǵaýy nazar aýdartady:
Bizge jańa ekonomıkalyq serpin kerek, shyn máninde jedel ári sheshýshi sharalar qabyldaý kerek;
О́nerkásipke, munaıǵa jáne basqa da mańyzdy salalarǵa basa nazar aýdarylady;
Biz otandyq óndiristi yntalandyrý sharalaryn qabyldaımyz. Qazaqstanda óndiriletin ónim úlesin ulǵaıtyp, ofteık kelisimsharttar júıesin tolyqtaı iske qosý qajet;
Bizdiń basty mindetimiz – otandyq bıznesti qoldaý;
Aýyl sharýashylyǵynyń áleýetin tıimdi paıdalaný mańyzdy;
Biz jasandy ıntellekt pen jańa tehnologııalardy paıdalaný múmkindikterin keńeıtýdi josparlap otyrmyz;
Zań ústemdigin qamtamasyz etý sharalary jáne halyqty tolǵandyratyn basqa da máseleler úkimettiń únemi nazarynda bolady.
Jańa Premer-mınıstrdiń «Kúshti Prezıdent, yqpaldy Parlament, esep beretin Úkimet» qaǵıdatyn basshylyqqa alatyn bolady degen úmittemiz.
Osy oraıda, biz parlamentarııler de Memleket basshysynyń tapsyrmalaryn oryndaýda, aldymyzda turǵan júkti Úkimetpen jumyla kóterip, bir maqsat, bir múddege jumys isteýge daıynbyz», delingen jazbada.