Senattyń Áleýmettik-mádenı damý jáne ǵylym komıtetiniń depýtattary «Astana jastary» jastar resýrstyq ortalyǵynda boldy. Elimizdegi jastar saıasatynyń ózekti máseleleri talqylaýdyń negizgi taqyryby boldy, dep habarlaıdy Egemen.kz Senattyń baspasóz qyzmetine silteme jasap.
«Jastardy júıeli jáne jan-jaqty qoldaý máselesinde birqatar problema bar. Jumyssyzdyq, jastardyń beıresmı jumys isteýi jáne ýaqytsha jumys oryndary solardyń qataryna jatady. О́kinishke qaraı, bizdiń qolymyzda bul týraly naqty derekter joq. Jalpy osy máselelerdiń bárin jan-jaqty qarastyryp, mańyzdy usynystar ázirleý qajet», dedi senator Nurtóre Júsip kezdesý barysynda.
Mádenıet jáne aqparat mınıstrliginiń ókili osyǵan baılanysty jastardyń áleýmettik jáne jeke damýyna yqpal etetin, jastar uıymdarynyń qyzmetin qoldaıtyn, sondaı-aq aqparattyq jáne konsýltasııalyq qyzmetter kórsetetin Jastar resýrstyq ortalyqtarynyń qyzmeti týraly aıtyp berdi. Elimizdiń barlyq óńirlerinde osyndaı 232 ortalyq jelisi jumys isteıdi, onyń ishinde 16 oblystyq, 37 qalalyq, 179 aýdandyq ortalyq bar.
Otyrysqa eńbek jáne halyqty áleýmettik qorǵaý, ǵylym jáne joǵary bilim, týrızm jáne sport mınıstrlikteriniń ókilderi, sondaı-aq densaýlyq saqtaý jáne jastar saıasaty salasyndaǵy sarapshylar qatysty.
Bul kezdesý «Demografııalyq ósý – ulttyń básekelestik artyqshylyqtarynyń negizi» taqyrybyna arnalǵan Úkimettik saǵatqa daıyndyq aıasynda uıymdastyryldy.