Shyǵystyń keıbir aýdandarynda qar qalyń. Kún kúrt jylynsa, qarǵyn sý qaýpi 71 eldi mekenge tóngeli tur. Sondyqtan mamandar kóktem mezgiline daıyndyqty búginnen bastap ketti.
Shyǵys Qazaqstan oblysy ákiminiń ókimimen 1 aqpannan bastap bolýy yqtımal sý tasqyny kezeńine joǵary daıyndyq rejimi engizildi. Áýeli, sý aıdyndaryna monıtorıng júrgiziledi. Eldi mekenderdegi qar múmkindiginshe syrtqa shyǵarylady. Qazirgi ýaqytta jergilikti atqarýshy organdar 54 000 tekshe metrden astam qardy dalaly jerge aparyp tókken. Sý tasqyny qaýpi tóne qalsa, oblysta jedel den qoıý úshin qutqarýshylar men jergilikti atqarýshy organdardyń jeke quramynyń 2 334 adamy, 223 motopompa, 61 júzý quraly, sondaı-aq, 735-ten astam ózge de tehnıka toptastyrylǵan. 34 285 dana qap, 5 974 tonna ınertti materıal jáne 328 tonnadan astam JJM daıyndaldy. Tótenshe jaǵdaı bola qalsa, evakýasııalanatyn halyqty ornalastyrý úshin qalalar men aýdandardyń ákimderi jalpy syıymdylyǵy 17 600 adamǵa arnalǵan 153 ýaqytsha ornalastyrý pýnktin daıyndady.
Mamandar boljaǵandaı, Shyǵys Qazaqstanda sý tasqyny qaýpi bar 71 eldi meken naqtylanǵan. Qutqarýshylar úılerdi aralap, sý basý qaýpi tóngen halyqqa nusqaý jumystaryn júrgizdi. Máselen, aldymen aýla aýmaǵyn qardan tazartý qajet. Ásirese, oıda turǵan úılerdiń turǵyndary aryqtyń boıyn tazartyp, erigen qar sýy aǵatyndaı etip ashyp tastaǵany jón. Múmkindikterine qaraı, ınertti materıaldardy qapqa toltyryp, saqadaı-saı otyrǵandary abzal. Sý basý qaýpi tónip turǵan úı bolsa, jertólesindegi azyq-túlikti qurǵaq jerge saqtaý kerek desedi mamandar.
– Biz óz tarapymyzdan sý tasqyny qaýpin aldyn alý úshin barlyq sharalardy jasap jatyrmyz. Turǵyndar da jaýapkershilik tanytsa eken. Qalaı desek te, tilsiz jaýdyń bolý-bolmaýyn dóp basyp aıta almaspyz. Mamandar boljaıdy. Sondyqtan daıyn bolýymyz kerek, – dep atap ótti ShQO TJD TJ aldyn alý basqarmasy bastyǵynyń mindetin atqarýshy Dına Beksultanova.
Keshe Tótenshe jaǵdaılar departamenti mamandary Býtakova aýylynyń tusynda Úlbi ózeniniń muzyn jardy. Sebebi, dál osy tusta muz qalyńdyǵy 20-30 santımetrge jetken. Kún jylyna ózen betinde muz keptelse, arnasynan asqan sýǵa bógeý qoıý qıynǵa soǵady. Sol úshin de aldyn alý jumystaryna erte kirisken.
Shyǵys Qazaqstan oblysy