Memlekettik «Aýyl – el besigi» baǵdarlamasynyń shapaǵatyn shalǵaı aýyldardyń turǵyndary naqty sezine bastady. Sonyń bir dáleli – aýyldyq jerlerde ashylyp jatqan feldsherlik-akýsherlik pýnktter.
Ulytaý oblysynda ótken jyly 5 feldsherlik-akýsherlik pýnkttiń qurylysy bastalǵan edi. Jyl sońyna deıin Jańaarqa aýdanyndaǵy bir nysannyń qurylysy aıaqtalyp, paıdalanýǵa berilgen de bolatyn. Endi mine, jańa jyldyń alǵashqy aıynyń sońǵy kúninde Ulytaý aýdanyndaǵy Sarysý aýylyndaǵy salynyp jatqan feldsherlik-akýsherlik pýnkttiń qurylysy bitip, halyq ıgiligine qyzmet ete bastady.
Munda barlyq jaǵdaı qarastyrylǵan. Kıim ilgishten bastap bári de zamanaýı jabdyqtalǵan. Sharýashylyq-turmystyq bólme, vestıbıýl-kútý aımaǵy, personalǵa, pasıentterge, sonyń ishinde, múgedekterge arnalǵan sanıtarlyq torap, zararsyzdandyrý, aqparattandyrý, egý, akýsher, feldsher, em-dom jasaý, hımızator kabınetteri keń de jaryq ári bári de osy zamanǵy medısınalyq qural -jabdyqtarmen qamtamasyz etilgen.
Feldsherlik-akýsherlik pýnkt bir aýysymda 25 adamǵa deıin qabyldaı alady. Aldaǵy ýaqytta oblys boıynsha taǵy 8 FAP ashylady dep josparlanǵan. Munyń 3-eýi – «Aýyl – el besigi», 5-eýi – «Aýyldyq densaýlyq saqtaýdy jańǵyrtý» ulttyq jobasy aıasynda qarjylandyrylady.