Elimizde jas qyzdarǵa arnalǵan «Tech girls» baǵdarlamasy iske qosyldy. Bul týraly Ortalyq kommýnıkasııalar alańynda Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa málimdedi. Jobaǵa 16 men 25 jas aralyǵyndaǵy qyz-kelinshekter qatysa alady.
Baǵdarlama ulttyq komıssııanyń, «Astana Hub» halyqaralyq tehnoparki jáne «Techno Women» qaýymdastyǵynyń bastamasymen júzege asyp jatyr. Mundaǵy maqsat – qyzdardyń sıfrlyq bilimin arttyrý, kodsyz jáne tómen kodty baǵdarlamalaý negizderin úıretý jáne qyzdardy STEM-ge tartýǵa yqpal etý.
– Qazaqstan sıfrlandyrý salasynda qarqyndy damyp keledi. Bizde offtek, fıntek sektorlary óte jaqsy damyǵan, ındýstrııalarda sıfrlandyrý damyp keledi. Eki aıǵa sozylatyn «Tech Girls» baǵdarlamasy eldiń barlyq aımaǵyn qamtıdy. 3 myńnan astam qyz-kelinshek IT-baǵyttar boıynsha tegin oqý múmkindigine ıe bolady. Bilim berý barysynda vebınarlar, vorkshoptar, tikeleı efırler, sondaı-aq «Techno Women» jáne «Astana Hub» sarapshylary men tálimgerlerimen sessııalar qarastyrylǵan. Mysaly, «No Code School» lendıngter, saıttar, mobıldi qosymshalar, chat-bottar jáne marketpleıster qurý negizderin úıretedi. «Low Code» baǵdarlamalaýdyń mınımaldy daǵdylary bar qosymshalardy ázirlegisi keletinderge jaramdy, al «Beta Career» kýrsy bedeldi IT-kompanııalarda mansaptyq konsaltıng jáne kásibı baǵdarlamalaý salasyndaǵy tájirıbeli mamandardan áńgimelesýden sátti ótý úshin qajetti bilim men daǵdylardy usynady. Osylaısha, qyzdardyń aqparattyq tehnologııalar salasyndaǵy áleýetin tolyq ashýǵa múmkindik beredi, – dedi «Astana Hub» basqarýshy dırektory Danııa Ahmetova.
Mundaı baǵdarlamalardyń mańyzdylyǵyn 2023 jyly iske qosylǵan «IT-Aiel» baǵdarlamasynyń tabysty tájirıbesi dáleldeı túsken. Sonyń arqasynda elimizdiń 17 óńirinen 2 myńnan astam jumyssyz áıel aqparattyq tehnologııalar salasyndaǵy mamandyqtarǵa tegin oqý múmkindigine ıe bolǵan. Bir jaǵynan bul jobalar – talanttardy damytýǵa ǵana emes, Qazaqstannyń sıfrlyq ekonomıkasynyń bolashaǵyna ınvestısııa.
– Byltyr «IT-Aiel» jobasy sátti júzege asyrylǵan edi. Onda 18 jastan asqan jumysqa ornalaspaǵan 2 675 áıel qatysýǵa ótinim berip, «No Code School», «Freelance School», sondaı-aq negizgi kompıýterlik saýat kýrstaryn oqydy. О́tinishterdiń basym bóligi 847-i Astana qalasynan jáne Aqmola oblysynan kelip túsken, Almaty qalasy jáne Almaty oblysy – 468, Oral qalasy jáne Batys Qazaqstan oblysy – 275, Atyraý qalasy jáne Atyraý oblysy 179 ótinish. Qatysýshylardyń ortasha jasy 32-de boldy. Baǵdarlama qorytyndysymen myńnan astam adam oqýdy aıaqtap, óz jobalaryn, IT ónimderin, saıt nemese qosymsha qurýdy rastaıtyn sertıfıkat aldy. «IT-Aiel» jobasyn ótkizý tájirıbesi bizge áıelder úshin bir-birin qoldap, bıznes-ıdeıalarmen, tájirıbe almasatyn ortanyń qalyptasýy qanshalyqty mańyzdy ekenin kórsetti. Bıyl biz ol jobany jańasha jańǵyrtyp, jalǵastyramyz dep sheshtik. О́ıtkeni byltyr bizge jas stýdent qyzdar da, uzaq ýaqyt dekrette otyrǵan áıelder de ótinim berdi. Ol – eki túrli aýdıtorııa. Sondyqtan jobany «Tech girls» jáne «Techno aiel» dep ekige bóldik. Nátıjesinde, bul jobalar IT-kadrlardy daıarlaýǵa aıtarlyqtaı úles qosady, IT sııaqty perspektıvaly, barynsha ınklıýzıvti jáne qomaqty aqy tólenetin salaǵa qosylatyn qyzdar men áıelder sany artady, – dedi Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Alına Ábdirahmanova.
Jas urpaqty IT salasynda tabysty mansapqa qajetti daǵdylarmen qamtamasyz etetin «Tech Girls» jobasyna ótinimder bıyl 7 aqpanda bastaldy. Qujattar 1 naýryzǵa deıin qabyldanady.